“`html
Banorët e Durrësit të zhgënjyer nga takimi me Ramën: Nuk na ofruan asnjë alternativë
Banorët e prekur nga projekti TID janë shprehur të zhgënjyer pas takimit mbi dy orësh me kryeministrin Edi Rama, zhvilluar në bashkinë e Durrësit. Një përfaqësues i tyre, pjesëmarrës në takim, deklaroi se kryeministri ishte i vendosur për zbatimin e projektit dhe banorëve nuk u është ofruar asnjë alternativë tjetër përveçse pranimit të tij.
“Në fillim të mbledhjes na u tha qartë se nuk keni alternativë tjetër veçse ta pranoni projektin, pra ai do të realizohet. Ne u thamë se nuk jemi kundër projektit, por përderisa kemi konstatuar gabime, pse nuk bëhet një rishikim i tij? Përgjigjja ishte negative, duke thënë se gjithçka do të prishet. Ne jemi këtu vetëm për t’ju ofruar alternativa çmimesh, opsione strehimi dhe ambiente ku mund t’ju vendosim,” tha përfaqësuesi.
Gjatë bisedës, të pranishmit shprehën pakënaqësinë e tyre për mënyrën kategorike të komunikimit. Kur ata tentuan të paraqisnin objekte me vlera arkitektonike dhe historike, të cilat çuditërisht nuk ishin as në listën e shpronësimeve, u tha se po rishikohej diçka. Megjithatë, sipas banorëve, çelësi kryesor për bashkinë dhe administratën do të ishte anulimi urgjent i të gjitha lejeve dhe vendimeve të IKMT-së. Përndryshe, ata kërcënuan se do të bashkohen për të mbrojtur çdo ndërtesë. “Nëse nuk anulohen ato, asnjë fjalë e thënë sot nuk ka vlerë.”
Banorët janë shumë të pezmatuar nga fakti që nuk lejohet opsioni i rishikimit të projektit dhe korrigjimi i gabimeve. Ata theksuan se edhe vetëm me dy raste të prezantuara gjatë takimit u dëshmua se projektet nuk janë studiuar siç duhet. “Ne po e themi prej më shumë se gjashtë muajsh se projektet janë bërë shumë keq, janë bërë gabim dhe nga këto gabime lindin këto probleme. Duket si një luftë forcash.”
Sipas banorëve, të hënën u është kërkuar të lirojnë banesat dhe pavarësisht nga bisedimet e zhvilluara, u janë dërguar letra të tjera nëpër shtëpi.
“`