“`html
“Na mungon Inigo Martinez, por skuadra ka liderë të tjerë”! Flik: Kundër Bryzhit vlejnë vetëm tri pikët
Hansi Flik, në orën 19:00, u paraqit para gazetarëve për të diskutuar ndeshjen e së mërkurës kundër skuadrës së Bryzhit. Ai konfirmoi listën e lojtarëve të disponueshëm, duke theksuar se skuadra që udhëtoi drejt Belgjikës është e njëjta si ajo që fitoi 3-1 kundër Elçes në ligë të dielën e kaluar. Joan Garcia, Ter Stegen, Pedri Gonzalez, Gavi, Rafinja dhe Andreas Kristensen vijojnë të jenë të padisponueshëm.
Për herë të parë nën drejtimin e Hansi Flik, skuadra do të zhvillojë stërvitjen në “Ciutat Esportiva” të martën në mëngjes, ndërsa pasditën do të udhëtojë drejt Bryzhit.
Trajneri i Barcelonës fillimisht u shpreh për kundërshtarin, duke theksuar rrezikun e krosimeve të forta në ajër. “Gjithmonë përballemi me të njëjtin problem, por kemi punuar për këtë në ndeshje të tjera. Ajo që më pëlqen është se lojtarët janë në një gjendje të mirë mendore kur përballen me këto situacione. Nuk është problem,” – tha Flik.
Më pas, ai u përqëndrua te mënyra e lojës së Barcelonës. Pavarësisht se “qau” mungesën e Inigo Martinez, Flik shprehu besimin se skuadra mbetet Barcelona edhe pa një lider të dukshëm. “Po, sezonin e kaluar lideri i madh ishte Inigo Martínez. Tani jam shumë i lumtur me Erik Garcian, Kubarsin dhe Ronald Araujon, të cilët luajtën shumë mirë kundër Elçes. Gerard Martín është një tjetër opsion,” – u shpreh ai.
Trajneri konsideroi gjithashtu thelbësore mungesën e Pedrit, por ka besim te De Jong. “Mendoj se po, mungesa e Pedrit është e madhe. Lidhur me rrezikun, mendoj se De Jong dhe Casado janë opsione për të luajtur nesër.”
Flik pranoi se nuk mund të krahasojë situatën aktuale me sezonin e kaluar për shkak të numrit të lojtarëve të dëmtuar. “Sezonin e kaluar u përballëm me Rafinjën, Levan dhe Lamin. Tani ata po kthehen nga lëndimet dhe duhet të shohim si do të veprojnë.”
Në fund, Flik foli për objektivin kryesor të skuadrës në Belgjikë. “Siç e kam thënë edhe më parë, duhet të fitojmë të tre pikët. Asnjë ndeshje nuk është e lehtë; duhet të kemi një mentalitet të mirë. Kundër Elçes kishim Robertin dhe Olmonin përsëri, dhe sot patëm një seancë stërvitore të shkëlqyer dhe me cilësi të lartë, gjë që është pozitive, por nuk është e lehtë. Gjithsesi, ne kemi vetëm një objektiv, të marrim tri pikët.”
DRITAN LUNDRA-PANORAMASPORT.AL
“`