“`html
“Nuk u dorëzuam dhe dhamë gjithçka kundër Atletiko Bilbao,” Flik flet për “luftën” në La Liga: 4 pikë janë shumë, por edhe asgjë
Barcelona përballet me një transfertë të vështirë nesër mbrëma kundër Atletik Bilbao. Pas eliminimit të dhimbshëm nga Kupa e Mbretit, trajneri Hansi Flik ka dalë në konferencën e zakonshme për shtyp.
Trajtimi i Lamine Yamal: “Menaxhimi i minutave të lojës së lojtarëve nuk është i lehtë. Unë flas me të gjithë dhe ata e dinë nëse do të luajnë apo jo. Unë kam planin tim, por e ndaj këtë përgjegjësi edhe me grupin, sepse ata duhet të mësojnë si ta menaxhojnë kohën e tyre të lojës për javët e ardhshme. Ne na nevojiten të gjithë deri në fund të sezonit. Ndonjëherë marrim vendime së bashku dhe herë të tjera i marr unë. Kështu dua ta menaxhoj ekipin.”
João Cancelo: “Kur vendosëm ta sjellim, e dinim se çfarë mund të kontribuonte. Ai ka cilësi të jashtëzakonshme me topin dhe një nivel shumë të lartë loje. Në dy ndeshjet që ka filluar, ai ka performuar shumë mirë dhe mund të shihet se po fiton vetëbesim.”
Avantazhi në renditje: “Për momentin, është diçka e rëndësishme, por ajo që ka vërtet rëndësi është se si përfundon gjithçka në fund të majit. Ka ende shumë ndeshje dhe shumë javë përpara. E pamë tashmë këtë të martën me lëndime të reja, diçka që i ka ndodhur edhe Real Madridit. Gjëja e rëndësishme tani është të shohim përpara dhe të pranojmë atë që ka ndodhur.”
Pedri: “Ai mund të luajë, është në dispozicion, por kemi disa ndeshje në ditët në vijim dhe do të duhet ta menaxhojmë kohën e tij të lojës me kujdes.”
Ndjenjat e ekipit pas ndeshjes me Atletiko Madrid: “Pas ndeshjes kundër Atletikos, ndjesia ishte shumë e mirë. E pashë ekipin shumë të motivuar. Kur ekziston ajo lidhje me tifozët, lojtarët mund të japin edhe më shumë. Mendoj se kjo është ajo që pamë në atë ndeshje, askush nuk u dorëzua dhe të gjithë u përpoqën të jepnin gjithçka. Në fund, nuk ndodhi kështu dhe duhet ta pranojmë. Por përshtypja ime është se ekipi është në një nivel të lartë dhe kjo duhet të na japë besim.”
Mungesat për nesër: “Është diçka që duhet ta menaxhojmë. Kur ke shumë ndeshje, është normale të kesh mungesa. Për fat të mirë, kemi shumë lojtarë me cilësi të lartë nga La Masia dhe tashmë kemi përvojë pune me ta. Duhet t’i menaxhojmë me kujdes ngarkesat e tyre të punës dhe mund të ketë disa ndryshime në ekip nesër.”
Si po ia del skuadra pas Kupës: “Atletiko Bilbao ka një skuadër fantastike dhe nuk përqendrohem shumë te ndeshjet e tyre të mëparshme. E dimë që nuk do të jetë një ndeshje e lehtë, po luajmë jashtë fushe dhe ata janë një kundërshtar edhe më i vështirë atje. Sa për ne, atmosfera në skuadër është shumë e mirë dhe jam shumë i kënaqur me mënyrën se si po ia del grupi.”
“`