BE: Gjobë prej 120 milionë eurosh për platformën X
Komisioni Evropian ka gjobitur shërbimin online të Elon Musk-ut me 120 milionë euro për mungesë transparence në reklama dhe llogari të përdoruesve.
“Detyra jonë është që të sigurojmë që legjislacioni ynë digjital të zbatohet”, theksoi Komisionerja e BE-së për Çështjet Digjitale, Henna Virkkunen, në Bruksel. Kjo është gjoba e parë e vendosur nga Komisioni sipas Ligjit të BE-së për Shërbimet Digjitale (DSA).
Llogari të rreme përdoruesish me pagesë, reklama të paqarta
Autoritetet e Brukselit nisën hetimin kundër X në dhjetor 2023. Ndër të tjera, Brukseli akuzon platformën X për përdorimin e shenjës së bardhë e blu për llogari përdoruesish me pagesë, duke sugjeruar në mënyrë të rreme se këto llogari janë autentike dhe të verifikuara.
Komisioni i BE-së gjithashtu kritikon faktin se nuk është gjithmonë e qartë se kush qëndron pas reklamave. Hetimi zbuloi gjithashtu se X nuk u dha studiuesve qasje në të dhënat publike në përputhje me rregulloret e DSA-së.
BE-ja po zhvillon hetime të mëtejshme kundër shërbimit online X të Musk-ut. Këto hetime përqendrohen ndër të tjera në mënyrën se si X lufton shpërndarjen e përmbajtjeve të paligjshme dhe manipulimin e informacionit.
Reagime dhe kërcënime nga SHBA
Aktakuza kundër X mund të zemërojë Presidentin e SHBA-së, Donald Trump, administrata e të cilit ka kritikuar vazhdimisht ligjet digjitale të BE-së. Trump ka kërcënuar se do të vendosë tarifa të reja për importet nga vendet, ligjet e të cilave, sipas tij, synojnë të “dëmtojnë” teknologjinë amerikane.
Pavarsësisht këtyre kërcënimeve, BE-ja ka deklaruar vazhdimisht se synon të zbatojë rregullat e saj.
Zëvendëspresidenti i SHBA-së, JD Vance, akuzoi në një postim në platformën X se BE-ja po sulmon “kompanitë amerikane për gjëra të pakuptimta”. Ai tha se BE-ja duhet të mbrojë lirinë e fjalës dhe jo të sulmojë kompanitë amerikane për gjëra pa vlerë.
Reagimi nga Gjermania
Ministri gjerman i Çështjeve Digjitale, Karsten Wildberger (CDU), e përshëndeti vendimin e Komisionit. “Legjislacioni digjital evropian vlen për të gjithë, pavarësisht nga vijnë”, tha ai. Ai bazhet “në vlerat evropiane dhe këto, sigurisht, duhet të zbatohen dhe mbrohen”.
Në të njëjtën kohë, politikani i CDU-së tha se e konsideron gjobën e vendosur ndaj X si shumë të lartë. Wildberger kërkoi gjithashtu një përqendrim më të madh në zhvillimin e zgjidhjeve digjitale në Evropë. “Sovraniteti digjital nuk do të thotë vetëm rregullim, por edhe të jesh në gjendje të mbash ritmin në fushën e teknologjisë”, argumentoi ministri, duke iu referuar industrisë evropiane të teknologjisë.