Si u thye më në fund rezistenca e brendshme e BE-së ndaj regjimit të Ayatollahëve
Vendimi i Bashkimit Europian për të shpallur Gardën Revolucionare Islamike të Iranit organizatë terroriste erdhi pas një rishikimi të qëndrimeve nga disa qeveri europiane, ku nevoja për të reaguar ndaj represionit brutal të Teheranit u konsiderua më e rëndësishme se rreziqet diplomatike.
Për javë të tëra, Franca, Italia dhe Spanja kishin paralajmëruar se një vendim i tillë do të mbyllte kanalet diplomatike me Iranin, do të rrezikonte qytetarët europianë dhe do të komplikonte bisedimet bërthamore. Por ky qëndrim ndryshoi pasi u hoq bllokada e internetit në Iran dhe u publikuan pamje të dhunës së Gardës Revolucionare ndaj protestuesve.
Diplomatja e lartë e BE-së, Kaja Kallas, tha se “kur mizoritë u bënë të qarta, u bë e qartë se duhej një reagim shumë i fortë nga Europa”. Presidentja e Parlamentit Evropian, Roberta Metsola, deklaroi se pas pamjeve tronditëse nga Irani, Europa duhej të vepronte.
Italia dhe Spanja ndryshuan pozicion, duke mbështetur shpalljen e Gardës Revolucionare organizatë terroriste, duke e vendosur atë në të njëjtën kategori me Al-Qaeda, Hamas dhe Daesh.
Franca ishte vendi i fundit që hoqi dorë nga kundërshtimi, pasi presioni nga partnerët u bë i madh. Zyrtarët francezë kishin frikë se vendimi do të dëmtonte negociatat bërthamore dhe dialogun diplomatik, si dhe do të rrezikonte dy shtetas francezë të ndaluar në Iran. Por Parisi më në fund u tërhoq, duke theksuar se vdekjet e mijëra protestuesve nuk mund të injoroheshin.
Shtetet e Bashkuara, që e shpallën Gardën Revolucionare organizatë terroriste që në vitin 2019, kanë ushtruar presion ndaj BE-së për këtë vendim. Presidenti Donald Trump paralajmëroi se “koha po mbaron” për regjimin iranian.
Nga ©Lapsi.al