Berisha: Kjo është hera e parë që dyert e Europës na janë mbyllur!
Kreu i Partisë Demokratike, Sali Berisha, ka uruar qytetarët shqiptarë për Ditën e Verës nga Elbasani.
Lideri i opozitës theksoi se shqiptarët festojnë sot më të bindur se kurrë se “festën tjetër të keqen ia lanë dimrit”, duke shtuar se Edi Rama dhe Belinda Balluku nuk kanë të ardhme.
Kryedemokrati shtoi gjithashtu se është e trishtë dhe e dhimbshme që në 34 vite kjo është dita e parë e verës në të cilën dyert e Europës u mbyllën për shqiptarët për shkak të veprimeve të pashembëllta në historinë e vendeve që synojnë integrimin, të shkaktuara nga dyshja Rama-Balluku.
“Së pari, qytetarëve, banorëve të Elbasanit, sot si kryeqyteti i festës për mbarë kombin, u uroj gëzuar Ditën e Verës, festën më të lashtë jo vetëm të shqiptarëve, por edhe të kombeve të tjera. Është një ditë që ngjall shpresë, frymëzon ripërtëritje, një ditë gëzimi.
Dhe sot këtë festë shqiptarët e festojnë më të bindur se kurrë se festën tjetër të keqen ia lanë dimrit, dhe Rama me Lubinë të ardhme nuk kanë më. Kjo është dita e fundit e verës që ata i gjen me karrige të thyer, ashtu siç janë. Nuk e meritojnë!
Ndaj dhe le të urojmë që ditën e ardhshme të verës, qytetarët e Elbasanit dhe mbarë Shqipërisë ta festojnë siç ua do zemra, ta festojnë me dyer të hapura drejt të ardhmes dhe drejt Europës.
Është e trishtë dhe e dhimbshme se në 34 vite kjo është dita e parë e verës në të cilën dyert e Europës u mbyllën për shqiptarët për shkak të veprimeve të pashembëllta në historinë e vendeve që synojnë integrimin nga dyshja Rama-Balluku.
Ndaj dhe le të urojmë dhe të punojmë që dita tjetër e verës të na gjejë sa më afër ëndrrës sonë evropiane,” tha Berisha.