“`html
Berisha në dalje të SPAK: “Irena me 5 mbiemra u shpall e pafajshme me urdhër politik”
Kreu i Partisë Demokratike të Shqipërisë, Sali Berisha, ka ashpërsuar tonet ndaj drejtësisë dhe qeverisë, në një deklaratë për mediat pas paraqitjes së tij pranë SPAK, ku është i detyruar të paraqitet dy herë në javë.
Në dalje të godinës së SPAK, Berisha hodhi akuza të drejtpërdrejta ndaj kreut të SPAK-ut, Altin Dumani, dhe ndaj kryeministrit Edi Rama, duke i akuzuar për mbrojtje të individëve të përfshirë në, sipas tij, falsifikime dhe shkelje të rënda ligjore.
“Sot thashë se Dumani merr edhe mbiemrin Maneku sepse në një akt më të turpshëm, në një akt flagrant të mbrojtjes së krimit, Edi Rama dhe Altin Dumani nxorën të pafajshme Irenën me 5 mbiemra. Çdo qytetari i kërkoj vëmendjen e tij sepse ky është një rast unik në historinë e drejtësisë. Se si një kriminele, se si një delinkuente hap dosje me urdhër të Ramës tek Altin Troplini me qëllimin e vetëm për t’u nxjerrë e pafajshme,” u shpreh Berisha.
Ai shtoi se Altin Maneku Troplini, si “mercenari i Edi Ramës, armiku i egër i pluralizmit dhe votës së lirë të shqiptarëve,” mori një mbiemër të ri të denjë për të. Berisha tha gjithashtu se drejtësia vonon, por nuk harron.
“Tani, aty gjeta Ergys Agasin bashkë me Irena Dumanin, Irena Maneku Gjoka Dumani, etj. Gysi festonte se asnjë mandat ndërkombëtar nuk është lëshuar për arrestimin e tij. Gysi, gjoja, është në kërkim. Ai në fakt rrugën më të shpeshtë që bën, e bën për në Surrel. Po ta quajmë Surrelin një republikë tjetër, atëherë mund të themi, por ai është një vizitor i shpeshtë i Surrelit,” tha Berisha.
Duke iu kthyer rastit të Irena Gjoka Maneku Dumani, ai tha se sipas dokumenteve të paraqitura, ajo është përzënë dy herë nga Greqia për falsifikim dokumentesh dhe kombësie. Ajo ka paraqitur dokumente dhe vizë të falsifikuar, si dhe është paraqitur si minoritare, ndërkohë që është myzeqare.
Përveç kësaj, Berisha deklaroi se Irena Maneku Gjoka Dumani ka mashtruar duke autorizuar avokatin për të ndjekur çështje gjyqësore, ndërkohë që gjykata administrative e Janinës e ka dënuar me një vit burg për falsifikim.
“Tani shikoni se çfarë horrash pa moral, pa nder, pa dinjitet, pa ligj janë këta. KLP e merr në shqyrtim dosjen dhe pasi prokurori i përgjithshëm deklaron se është e dënuar në Greqi, Irena Gjoka Maneku, KLP e Irenës apo Irenat e KLP nuk e marrin në shqyrtim vendimin e prokurorisë por deklarojnë se këtë duhet ta shqyrtojë ILD-ja, sikur kjo nuk ishte gjykatëse,” theksoi Berisha.
Ai shtoi se Altin Troplini, me urdhër të Edi Ramës, i ka hapur çështje “pa emër” kësaj, sepse po t’i hapte çështje penale me emër siç ishte njeriu i përzënë nga Greqia, ajo do të duhej të largohej nga detyra automatikisht. Sipas tij, çështja penale u hap pa emër për t’u mbyllur me emër, duke e bërë atë të pafajshme.
“Një mbyllje të tillë të turpshme mund të bëjë vetëm Altin Troplini dhe askush tjetër. Mbyllja e turpshme ishte se Irena me 5 mbiemra nuk e ka ditur, pavarësisht se ka autorizuar avokatin, por nuk e ka ditur se është dënuar nga gjykata. Dhe me këtë rast ajo del e pafajshme, paçka se në të gjitha rastet e tjera të padijes, i padituri është dënuar pa asnjë hezitim,” tha Berisha.
Ai theksoi se Irena me 5 mbiemra nuk ka falsifikuar vetëm në Greqi, por ka falsifikuar të paktën pesë herë formularët për vetingun, ILDKP-në dhe për emërimet në gjykatën speciale, duke mashtruar shtetin shqiptar. Sipas tij, Altin Maneku e ka injoruar totalisht këtë, ndërkohë që persona të tjerë që kanë falsifikuar janë dënuar dhe nxjerrë nga detyra.
“Kjo nuk ndodh me Irenën me 5 mbiemra sepse është e mbrojtur nga familja më mafioze e Shqipërisë, që është familja Rama,” tha Berisha.
Përveç këtyre, Berisha shtoi se Irena Gjoka Maneku Dumani ka fshehur pasurinë e saj, duke përfshirë apartamente dhe garazhe. Ai sugjeroi se ka pasur një marrëveshje mes Irenës dhe Altin Dumanit, ku ata kanë neutralizuar njëri-tjetrin për shkak të fshehjes së pasurive.
“Kjo është siç e shihni të dashur qytetarë, pyeteni veten cili qytetar shqiptar i cili ka kryer pesë shkelje të rënda ligjore, krime, nuk përballet me dënimin? Duhet të jesh gjykatës special ose prokuror special që të mos ekzistojë ligji. Këta janë llumi i shtetit shqiptar, janë turpi i zyrtarëve shqiptarë, këta nuk kanë ligj, moral, dinjitet përveçse krim, krim dhe vetëm krim,” përfundoi Berisha.
“`