Kryetari i Partisë Demokratike, Sali Berisha, është paraqitur paraditen e të mërkurës, më 19 nëntor, në Prokurorinë e Posaçme (SPAK) për të tretën herë, për t’u marrë në pyetje lidhur me sulmin me armë zjarri nga punonjës të Gardës së Republikës ndaj protestuesve në ngjarjen e 21 janarit 2011. Në atë ngjarje humbën jetën katër qytetarë, dhe në kohën që ajo ndodhi, Berisha mbante postin e kryeministrit.
Pas daljes nga prokuroria, Berisha iu përgjigj pyetjeve të gazetarëve, duke deklaruar se ishte pyetur në lidhje me dhënien e ndonjë urdhëri, gjë që e kishte mohuar. Ai theksoi se nuk ka dhënë asnjë urdhër dhe se nuk ka pasur të japë urdhër për të shtënë punonjësve të Gardës së Republikës. Berisha argumentoi se Garda e Republikës funksionon bazuar në një ligj të posaçëm. Sipas tij, legjislacioni përcakton se punonjësi i Gardës së Republikës së Shqipërisë, në rastin e një sulmi, fillimisht qëllohet në ajër, pastaj në këmbë, dhe nëse sulmi vijon, vazhdon të qëllojë.
Berisha shtoi se ka qenë gjithmonë i hapur për të bashkëpunuar, por nuk është pyetur më parë. Më 30 tetor, ish-ministri i Brendshëm i asaj kohe, Lulzim Basha, u pyet gjithashtu nga hetuesit e SPAK për këtë ngjarje.
SPAK ka regjistruar procedim penal për ngjarjen e 21 janarit 2011, pasi Gjykata e Lartë, një vit e gjysmë më parë, vendosi të prishë vendimet e mëparshme të gjykatave dhe urdhëroi fillimin e hetimeve për kallëzimin e familjes Nika ndaj ish-kryeministrit Sali Berisha dhe ish-ministrit të Brendshëm, Lulzim Basha.
Të afërmit e Aleks Nikës, njërit prej protestuesve të vrarë para kryeministrisë gjatë protestës së Partisë Socialiste më 21 janar 2011, akuzojnë Berishën, Bashën dhe ish-komandantin e Gardës së Republikës, Ndrea Prendi, se kanë urdhëruar të qëllohet me armë ndaj pjesëmarrësve në protestë.
Aleks Nika ishte një nga katër viktimat e protestës së dhunshme të 21 janarit 2011, kur mbështetësit e Partisë Socialiste, atëherë në opozitë, u përplasën me Policimë dhe Gardën e Republikës para selisë së Kryeministrisë në Bulevardin Dëshmorët e Kombit. Protesta ishte thirrur nga Partia Socialiste pas publikimit të një videoje, ku ministri i Jashtëm i kohës, Ilir Meta, akuzohej se po diskutonte një aferë korruptive.
Si pasojë e të shtënave me armë zjarri nga ana e Gardës së Republikës, më 21 janar 2011, përveç Aleks Nikës, u vranë edhe Ziver Veizi, Hekuran Deda dhe Faik Myrtaj, ndërsa u plagosën 10 protestues të tjerë.
Për vrasjen e Dedës, Myrtajt dhe Veizit, Prokuroria kishte proceduar penalisht ish-komandantin e Gardës Ndrea Prendi dhe gardistin Agim Llupo, duke kërkuar dënimin e tyre me 23 dhe 25 vjet burgim, respektivisht. Më 18 shtator 2013, Gjykata e Apelit në Tiranë e dënoi Prendin me 1 vit heqje lirie dhe Llupon me 3 vjet, duke arsyetuar se vrasjet ishin bërë nga pakujdesia. Ky vendim kontrovers solli reagime të forta.
Ndërkohë, vrasjet e Aleks Nikës dhe Hekuran Dedës, si dhe plagosja me armë zjarri e 6 personave të tjerë gjatë protestës së Partisë Socialiste para kryeministrisë, kanë mbetur pa autorë dhe prokuroria i kishte pezulluar hetimet për vite me radhë në kërkim të provave.
Vendimi i Gjykatës së Lartë erdhi pasi, në nëntor 2023, Gjykata Europiane e të Drejtave të Njeriut (GJEDNJ) konstatoi se hetimet e mangëta të kësaj ngjarje kishin cënuar të drejtën e jetës së viktimave.