“`html
Protesta e nesërme / Berisha: Rama do të ketë fatin e Enver Hoxhës për së gjalli
Sali Berisha akuzoi Kryeministrin Edi Rama se duke penguar drejtësinë, ai vë në rrezik procesin e integrimit europian të Shqipërisë.
Gjatë një fjalimi mbajtur në “Foltorja e PD”, Berisha deklaroi se Rama refuzoi kërkesën e Bashkimit Europian për të mos penguar drejtësinë, duke rrezikuar kështu procesin e integrimit të vendit.
Sipas tij, mesazhi i dërguar Ramës në Bruksel ishte i qartë: të mos pengohej drejtësia, përndryshe Shqipërisë do t’i mbyllej dera e integrimit. Megjithatë, Berisha theksoi se përgjigjja e Kryeministrit ishte refuzuese.
“Sot në mëngjes Edi Rama u përgjigj: më mbyllni derën, sepse lëkurën time nuk e shes kurrë dhe Lubinë nuk e dorëzoj, pasi po të dorëzoj Lubinë, duhet të dorëzoj veten time”, u shpreh Berisha.
Ai i bëri thirrje qytetarëve të martën t’i bashkohen protestës, pasi kjo është “beteja për integrimin e Shqipërisë në BE, për dyert e hapura të Shqipërisë”.
“Nesër, mesazhi ynë është një dhe vetëm një: mos guxo të luash me fatin e shqiptarëve, se fatin e Enver Hoxhës do ta kesh edhe ti për së gjalli”, tha Berisha.
Ai shtoi se në Bruksel, Edi Ramës iu transmetua një mesazh i qartë: “Mos pengo drejtësinë se ne të mbyllim derën”.
Berisha vijoi duke deklaruar se sot, Edi Rama u tha shqiptarëve se “integrimin e japim, por korrupsionin nuk e dorëzojmë. Por veten tonë, lëkurën tonë nuk e dorëzojmë”.
Në këtë kuadër, ai cilësoi protestat si “jetike dhe vendimtare për të shpëtuar atë ëndërr që ishte e formësuar nga Rilindja jonë”, duke iu referuar aspiratës për Shqipërinë si një vend i barabartë mes kombeve evropiane.
Berisha rikujtoi se kjo ëndërr u bë edhe ëndërr e rinisë shqiptare në vitet ’90 dhe motiv kryesor në luftën kundër diktaturës komuniste. Ai pohoi se PD, si “lokomotivë e proceseve të integrimit”, ka arritur të firmosë MSA-në, të liberalizojë vizat dhe të marrë rekomandimin për statusin e kandidatit.
“Programi ynë ka qëllimin më madhor, integrimin e Shqipërisë në BE. Pas çlirimit të Kosovës, interesi ynë kombëtar, ylli ynë polar është integrimi i Shqipërisë në BE,” theksoi ai.
Berisha përmbylli duke deklaruar se “një bajloz i zi, një organizatë kriminale, do t’u mbyllë shqiptarëve rrugën drejt Europës. Do të asgjësojë drejtësinë, shtetin ligjor, Kushtetutën, për të mbrojtur paratë e krimit, vilat, apartamentet, kontot bankare brenda dhe jashtë”.
Ai iu drejtua shqiptarëve me pyetjen retorike: “A do pranoni ju këtë? Kurrë.” Dhe përsëriti se “nesër është beteja për integrimin e Shqipërisë në BE, për dyert e hapura të Shqipërisë.”
“`