“`html
Berisha: Rama e ka shndërruar parlamentin në leckën e tij
Kryetari i Partisë Demokratike, Sali Berisha, gjatë një fjalimi të mbajtur në foltoren e parlamentit, ka akuzuar kryeministrin Edi Rama se e ka kthyer këtë institucion në “leckën e tij”.
Gjatë fjalës së tij, kryedemokrati u shpreh se mazhoranca socialiste nuk ka guxim të bëjë debat për integrimin europian, pasi nuk dëshiron të flasë për Belinda Ballukun. Sipas kreut të PD-së, arsyeja pse Rama nuk përballet me opozitën në Kuvend është për shkak të mosgatishmërisë për të ofruar transparencë para qytetarëve.
“Të dashur qytetarë, ju që e ndiqni këtë parlament, të shndërruar në mburojën më të turpshme në historinë e vjedhjeve të qytetarëve shqiptarë. Ky parlament, për herë të parë në 35 vite parlamentarizëm pluralist, mbron në mënyrën më të paskrupullt, më antikushtetuese, më antidemokratike, më antikombëtare, vjedhjet e Edi Ramës dhe klanit të tij familjar e qeveritar.”
“Çdo gjë që dëgjoni vjen nga fakti se Edi Rama e ka shndërruar këtë parlament në një leckë të vetën, ku nuk respektohet asnjë ligj, asnjë rregull, as Kushtetuta, asgjë tjetër veçse interesave të tij. Nuk ka ndodhur kurrë që shqiptarët të ngrihen në këmbë dhe mbarë bota për imunitetin e Lubi Ballukut, e cila në të vërtetë nuk ishte gjë tjetër veçse noterja e vjedhjeve të Edi Ramës, që vidhte bashkë me të, dhe ajo është sot me mandat. Është edhe një tjetër këtu, një Olta Xhaçka. Dy herë ka vendosur Gjykata Kushtetuese për ndërprerjen e mandatit të saj, Komisioni i Venecias ka marrë të njëjtin vendim. Ju garantoj unë këtu, zonja, secila prej jush do kishte fluturuar me kohë nga parlamenti po të kishte qenë rasti, por Olta jo, se Olta është e rrethit familjar. Këtu është problemi.”
“Ndaj dhe debatet shtyhen. Nuk mund të shtyhen debatet, mor zotëri, kanë afate kushtetuese. Nuk negociohen interpelancat, kanë afate ligjore kushtetuese. Por shtyhen se Edi Rama nuk do parlament. Sepse në këtë parlament, qytetarët presin transparencën e vjedhjeve të tij. Vetëm AKSHI i dy Lindave është botëror. Ajo e gjora Mirlindë, me katër apartamente e vila, por ju nuk guxoni ta shqiptoni atë. Prandaj dhe e shndërroni parlamentin në një hiç, e shumëzoni me zero. Dilni këtu pa asnjë rregullore, pa asgjë, nuk e respektoni as Kushtetutën në asnjë nen që takohet me parlamentin. Si ka mundësi? Si ka mundësi të jeni kaq të dobët para ligjit, para Kushtetutës? Vetëm e vetëm për një njeri. Secili prej jush, çfarë kujtoni se këta që janë këtu, do kishin marrë udhë me kohë. Lubia jo, se ka 25 vjet me regjistër me të.”
“Sigurisht që e shtytë debatin për integrimin, nuk mund ta bënit, se ishte debati këtu për Lubinë dhe ju nuk donit të hapej kurrë ai debat”, përfundoi Berisha.
“`