“`html
Berisha: Shqipëria ka barrën fiskale më të lartë në botë për naftën. Rama tallet!
Opozita mbajti mbrëmjen e sotme një “Foltore” pranë Kryeministrisë. Kryedemokrati Sali Berisha, gjatë fjalës së tij, foli për çmimin e naftës në vend, duke e cilësuar atë si më të lartin në botë. Ai akuzoi kryeministrin Edi Rama se po “tallet me shqiptarët” dhe se ka një qëndrim armiqësor ndaj të rinjve shqiptarë.
“Nafta ka arritur nivelet më të larta në botë, 220 lekë. Mashtruesi deklaron se nëse çmimi rritet mbi këtë nivel, do të ulë me 8 lekë akcizën. Kjo nuk është asgjë. Problemi është se deri në këtë nivel, rritja e TVSH-së është mbi 8 lekë dhe nuk kthen asnjë qindarkë. Problemi është se mbi litrin e naftës është vendosur barra fiskale më e lartë në botë. Kushdo që dëshiron, mund të kërkojë në Google: vendi me barrën fiskale më të lartë për naftën në Europë, del Shqipëria. Vendi me barrën fiskale më të lartë për naftën në botë, del Shqipëria. Kurse ky tallet me shqiptarët duke u thënë se do të lëvizë akcizën kur nafta të tejkalojë 220 lekë. Ai nuk ka asnjë skrupull dhe mëshirë.”
Berisha shtoi më tej:
“Qëndrimi i tij ndaj të rinjve shqiptarë është më armiqësori i mundshëm. Studentëve shqiptarë u them edhe njëherë: ju, të dashur studentë, paguani tarifën më të lartë në Europë pas studentëve të Britanisë së Madhe dhe Holandës. Ju paguani një tarifë 4 herë më të lartë se studentët e Austrisë, Sllovenisë, Francës, Gjermanisë. Dhe nëse e marrim në proporcion me pagat, është 16 herë më e lartë. Dhe ky vjen e u tregon dokrra.”
Ai vijoi duke kritikuar deklaratat e Ramës lidhur me vizat:
“Vjen e u thotë studentëve se më rrihnin dhe më burgosnin nëpër komisariatet e aeroporteve për problemin e vizave. Ai mashtron në mënyrën më ordinere. Vizat jo që nuk i hoqi ai, por përkundrazi, bëri grevë urie në këtë shesh që vizat të mos hiqeshin për shqiptarët, dhe tani u thotë atyre se kjo ishte arritja e jetës sime. Kemi të bëjmë me një njeri që nuk ka turp, nuk ka ndjenja, që ka korruptuar gjer në palcë, veçanërisht mediat shqiptare, të cilat shpërndajnë në linjat e tyre mashtrime dhe trillime 24 orë në ditë.”
“`