Radarë dhe kamera: Berlini përgatitet të mbrohet nga sulmet me dronë
Kryeqyteti gjerman po zhvillon një projekt ambicioz për të forcuar mbrojtjen e qytetit kundër sulmeve me dronë. Sipas raportimeve të medias, një rrjet i sofistikuar sensorësh, radarësh dhe kamerash do të vendoset në të gjithë Berlinin. Këto pajisje do të kenë si qëllim zbulimin e dronëve dhe sigurimin e ngjarjeve të rëndësishme, vizitave zyrtare dhe objekteve strategjike.
Projektet parashikojnë që sistemet të jenë plotësisht funksionale brenda gjashtë muajsh. Për menaxhimin dhe monitorimin e tyre, pritet të ngrihet një qendër kontrolli, e cila mund të vendoset në ish-Aeroportin Tempelhof.
Investimi për këtë projekt sigurie pritet të kalojë pesë milionë euro. Paralelisht, po vërehet një rritje e shpenzimeve për mbrojtjen civile, me synim rritjen e sigurisë së banorëve të qytetit.