Afganistani dhe Pakistani nisin sot bisedimet në Katar për armëpushimin
Afganistani dhe Pakistani kanë filluar sot bisedime paqësore në Doha, duke synuar t’i japin fund përplasjeve ndërkufitare që kanë shkaktuar humbje jetësh për dhjetëra njerëz.
Zëdhënësi i qeverisë talebane në Afganistan, Zabiullah Mujahid, deklaroi: “Sikurse u zotuam, negociatat me palën pakistaneze do të zhvillohen sot në Doha.”
Një delegacion i lartë afgan, i udhëhequr nga ministri taleban i Mbrojtjes, Mullah Muhammad Yakub, ka nisur drejt Doha-s.
Pas ndërprerjes së armëpushimit, zyrtarë nga të dy vendet udhëtojnë sot drejt Katarit për negociata, me shpresën për t’i dhënë fund përplasjeve ndërkufitare që kanë marrë jetën e dhjetëra njerëzve.
Gjatë shpalljes së armëpushimit të mërkurën në Islamabad, u tha se ky do të zgjaste 48 orë. Megjithatë, Afganistani vlerësoi se do të ishte në fuqi deri në një shkelje nga pala kundërshtare.
Ditën e djeshme në mbrëmje, Kabuli akuzoi Pakistanin fqinj se ka shkelur armëpushimin, pas sulmeve që shkaktuan vdekjen e të paktën 10 civilëve në provincën Paktiqa, në lindje të Afganistanit.
Burime pakistaneze të sigurisë konfirmuan “sulme ajrore precize në territorin afgan.”
Sot në mëngjes, të dyja palët njoftuan se po dërgojnë delegacione në Katar për bisedime. Sipas burimeve, Pakistani do të përfaqësohet nga ministri i Mbrojtjes Khawaja Asif dhe kreu i shërbimeve të inteligjencës, gjenerali në detyrë Asim Malik, siç raporton televizioni shtetëror.