“`html
“Nëse preferoni mund të…”: Prapaskenat e bisedimeve mes ministrit iranian, Kushner dhe Witkoff në Gjenevë!
Mediat e huaja raportojnë se fjalët e ministrit të Jashtëm iranian, Araghchi, drejtuar zyrtarëve amerikanë gjatë një takimi në Gjenevë, kanë kontribuar në nisjen e sulmeve nga Shtetet e Bashkuara dhe Izraeli kundër Iranit.
NBC News raporton se takimi mes delegacioneve të Shteteve të Bashkuara dhe Iranit, ku diskutimet u fokusuan te programi bërthamor i Teheranit, u shoqërua me tensione dhe përplasje verbale.
Sipas NBC News, Araghchi ka shprehur pakënaqësi gjatë bisedimeve ndaj të dërguarit special të presidentit amerikan Donald Trump, Steve Witkoff, si dhe ndaj dhëndrit të Trump, Jared Kushner, i cili ishte gjithashtu i pranishëm.
Duke cituar një zyrtar të lartë, raporti thekson se Araghchi këmbënguli se Irani ka një “të drejtë të patjetërsueshme” për të pasuruar uranium dhe sfidoi palën amerikane të deklaronte nëse SHBA-të kishin një “të drejtë të patjetërsueshme” për ta penguar Iranin.
Lajmi raporton se Araghchi i tha Witkoff: “Nëse preferoni, unë mund të iki”. Pas kësaj, delegacioni amerikan informoi presidentin Trump për zhvillimet.
Po sipas burimeve të cituara nga mediat ndërkombëtare, kreu i Shtëpisë së Bardhë nuk e fshehu “zhgënjimin” për mënyrën si u zhvilluan bisedimet.
Vetëm disa orë më vonë, situata mori një kthesë dramatike. Në orën 02:30 të mëngjesit (me orën amerikane), Trump publikoi një video në rrjetet sociale, duke njoftuar nisjen e “operacioneve të mëdha ushtarake” kundër Iranit.
“`