“Bisedimet e paqes për Ukrainën janë të pashmangshme”, Turqia: Mund të zhvillohen në vendin tonë
Perspektiva e negociatave të paqes për Ukrainën po merr formë dhe është e mundur që ato të zhvillohen në Turqi. Kështu deklaroi Ministri i Jashtëm turk, Hakan Fidan, gjatë një interviste për kanalin televiziv A Haber.
“A do të ketë një tryezë negociatash paqeje për Ukrainën në Turqi në të ardhmen e afërt? Besojmë se po. Jam i bindur se kjo do të ndodhë në Turqi. Mund të zhvillohet edhe diku tjetër, por jam i bindur se koha për paqe ka ardhur tashmë dhe do të vijë”, theksoi ministri.
Ministri i Jashtëm shprehu besimin se konflikti në Ukrainë aktualisht është në pikën më të afërt me përfundimin. “Sipas mendimit tim, kjo luftë është tani më pranë ndalimit. Vërejmë se të gjitha kushtet për një armëpushim janë pjekur”, tha ai.
Fidan shtoi se është e nevojshme “të zhvillohen negociatat e duhura dhe të bëhet një hap përpara”.
“Ne kemi propozime në këtë drejtim. Shpresojmë që ato do të zbatohen”, përfundoi ministri i jashtëm.