Trump njofton fillimin e bisedimeve për Groenlandën, shpreson për një ‘marrëveshje të mirë’
Presidenti i Shteteve të Bashkuara, Donald Trump, ka deklaruar se negociatat për Groenlandën kanë filluar dhe ka shprehur optimizëm për arritjen e një “marrëveshjeje të mirë” si për Uashingtonin, ashtu edhe për Evropën.
“Kemi filluar negociatat”, u shpreh ai, duke iu përgjigjur pyetjeve të gazetarëve nëse kishte qenë në kontakt me udhëheqësit evropianë lidhur me këtë çështje. Trump shtoi: “Mendoj se do të jetë një marrëveshje e mirë për të gjithë, një marrëveshje shumë e rëndësishme, nga pikëpamja e sigurisë kombëtare – një marrëveshje shumë, shumë e rëndësishme. Besoj se do të arrijmë një marrëveshje atje”.
Sipas Presidentit Trump, është arritur një konsensus për çështje të shumta dhe se edhe Evropa dëshiron që SHBA të arrijë një marrëveshje.
Më 21 janar, pas takimit me Sekretarin e Përgjithshëm të NATO-s, Mark Rutte, Presidenti Trump kishte njoftuar se ishin përpiluar skicat e një marrëveshjeje për Groenlandën. Sipas raportimeve të Axios, draft-marrëveshja që Rutte i kishte propozuar Trump-it përcaktonte ruajtjen e sovranitetit të Danimarkës mbi Groenlandën dhe përditësimin e kushteve të marrëveshjes së vitit 1951 për mbrojtjen e ishullit. Kjo do të mundësonte SHBA-në të krijonte baza ushtarake dhe “zona mbrojtëse” në ishull në rast nevoje për NATO-n.
Megjithatë, Kryeministrja daneze, Mette Frederiksen, deklaroi më vonë se Rutte nuk kishte pasur autoritetin për të zhvilluar negociata të tilla në emër të Danimarkës. Ajo theksoi gjithashtu se procesi i negociatave ishte rikthyer në “rrugën tradicionale” të përpjekjeve diplomatike.