Ndryshime në Buxhetin 2025: Bonus 15 Mijë Lekë për Familjet me Ndihmë Ekonomike
Këshilli i Ministrave ka miratuar Aktin Normativ të fundit të vitit, duke sjellë ndryshime në buxhetin për vitin 2025. Këto ndryshime parashikojnë dhënien e një bonusi fundviti prej 15 mijë lekësh për familjet që përfitojnë Ndihmë Ekonomike, Personat me Aftësi të Kufizuar dhe kujdestarët e tyre. Pritet që nga ky bonus të përfitojnë rreth 148,500 qytetarë.
Sipas Ministrisë së Financave, fondet e pashpenzuara nga ministritë dhe institucionet buxhetore do të transferohen në Fondin e Veçantë të Pensioneve. Kjo shumë, e cila parashikohet të jetë minimalisht 150 milionë euro, do të jetë e destinuar për Reformën e Pensioneve.
Ndryshimet në buxhetin e vitit 2025 përfshijnë gjithashtu mbështetje shtesë për sektorin e bujqësisë, me rreth 2 miliardë lekë shtesë. Si pasojë, fondi total i alokuar për bujqësinë në vitin 2025 do të arrijë në 6.4 miliardë lekë.
Sektori i shëndetësisë do të përfitojë 18 milionë euro për furnizimin me ilaçe në spitale. Ndërkohë, pushteti vendor do të mbështetet me 1.2 miliardë lekë për shlyerjen e detyrimeve të prapambetura. Vlera e alokuar për pushtetin vendor në total është e barazvlefshme me rreth 40% të detyrimeve të prapambetura të bashkive.
Ministria e Financave thekson se këto masa synojnë forcimin e stabilitetit ekonomik dhe rritjen e mbështetjes sociale për qytetarët.