Britania dhe Norvegjia bashkojnë forcat detare për të monitoruar anijet ruse
Britania e Madhe dhe Norvegjia do të lidhin një marrëveshje mbrojtëse që do të bashkojë flotat e tyre luftarake për të gjurmuar nëndetëset ruse në Atlantikun e Veriut. Kjo marrëveshje synon të mbrojë kabllot e rëndësishme nënujore, të cilat po përballen me kërcënim në rritje nga Moska. Ministria britanike e Mbrojtjes theksoi se ka pasur një rritje prej 30% të anijeve ruse të raportuara në ujërat britanike gjatë dy viteve të fundit.
Njoftimi vjen ndërsa kryeministri britanik, Keir Starmer, pret homologun e tij norvegjez, Jonas Gahr Støre, në bazën ajrore RAF Lossiemouth në Skocinë veriore. Marrëveshja, e quajtur “Lunna House” – sipas emrit të bazës në Ishujt Shetland të përdorur nga rezistenca norvegjeze gjatë Luftës së Dytë Botërore – mbështetet nga një marrëveshje paraprake BM-Norvegji prej 13,3 miliardë dollarësh, e nënshkruar në shtator.
Fregatat e tipit 26, të cilat do të ndërtohen në kantierin e “BAE Systems” në Glasgow, do të mundësojnë operimin e përbashkët të një flote prej të paktën 13 anijesh nga Britania e Madhe dhe Norvegjia në Europën veriore. Pesë prej këtyre anijeve do të jenë norvegjeze.