Pas protestave, presidenti bullgar paralajmëron zgjedhje të parakohshme dhe i bën thirrje qeverisë të japë dorëheqjen.
Presidenti i Bullgarisë, Rumen Radev, i ka kërkuar qeverisë së pakicës të kryeministrit Rosen Zhelyazkov të dorëhiqet pas protestave masive të zhvilluara gjatë kësaj jave kundër buxhetit të saj për vitin 2026.
Qeveria të martën tërhoqi projektbuxhetin, pas demonstratave mbarëkombëtare kundër rritjes së planifikuar të taksave. Ky është buxheti i parë i hartuar në euro, përpara se vendi anëtar i Bashkimit Evropian të miratojë monedhën e përbashkët më 1 janar.
Kriza buxhetore është shenja më e fundit e paqëndrueshmërisë politike në vendin ballkanik, i cili ka mbajtur shtatë palë zgjedhje në katër vjet, ndërsa një sërë koalicionesh të dobëta janë shpërbërë. Zgjedhjet e fundit u zhvilluan në tetor 2024, por parlamenti miratoi kabinetin vetëm në janar, pas muajsh negociatash.
“Bullgaria ka nevojë për një ndryshim të vërtetë që do të çojë në sundimin e ligjit dhe rivendosjen e shtetësisë, dhe kjo është diçka që koalicioni aktual qeverisës nuk mund ta arrijë,” tha Radev në një fjalim mbarëkombëtar, të transmetuar nga transmetuesi shtetëror BNT të martën në mbrëmje.
Ai shtoi se protestat e së hënës kanë treguar se qeveria nuk ka arritur të përmbushë pritjet e popullit dhe duhet të japë dorëheqjen menjëherë.
“Zgjedhjet e parakohshme janë e vetmja rrugë përpara,” theksoi Radev.