Bundesliga miraton rregullin e ri, një risi për lojtarët e kampionatit gjerman
Në mbledhjen e Federatës Gjermane të Futbollit (DFL), 36 klubet votuan në favor të vendosjes së një rregulli të ri për kostot e skuadrës. Sipas këtij rregulli, buxheti për pagat e lojtarëve të licencuar nuk do të lejohet të kalojë 70% të të ardhurave përkatëse.
Ky rregull i ri për kostot e skuadrës do të hyjë në fuqi duke filluar nga sezoni 2026/27, fillimisht me një sistem penalizimesh më pak të rreptë. Më pas, ai parashikohet të zbatohet plotësisht nga sezoni 2028/29.
Vendimi u miratua unanimisht nga përfaqësuesit e 36 klubeve të Bundesligës dhe Bundesliga 2. Deri më tani, DFL ka menaxhuar financimin e skuadrave përmes vlerësimeve të likuiditetit dhe rregullave për kapitalin vetjak.
Qëllimi kryesor i rregullit të ri është “të sigurojë stabilitetin financiar afatgjatë dhe të qëndrueshëm të klubeve, dhe rrjedhimisht të gjithë shoqatës së ligës” në kushtet e reja aktuale. Sipas DFL, ky rregull nuk pritet të ndikojë në dinamikën e konkurrencës kombëtare, as në konkurrueshmërinë e klubeve gjermane në arenën ndërkombëtare.
Presidenti i ligës, Hans-Joakim Vatzke, deklaroi: “Klubet profesioniste gjermane i menaxhojnë financat e tyre në mënyrë shumë racionale krahasuar me homologët ndërkombëtarë. Fakti që rrallëherë ka pasur probleme me kërkesat e rrepta të kritereve të licencimit financiar nënvizon suksesin e sistemit dhe profesionalizmin në Bundesliga. Megjithatë, është e nevojshme që rregulloret financiare të shtrëngohen më tej.”
Rregulloret e reja financiare do të monitorohen vazhdimisht. Rregulli për kostot e skuadrës, i prezantuar nga DFL, bazohet në parim në rregulloret financiare të UEFA dhe parashikon që, nga sezoni 2026/27 e tutje, kostot e skuadrës të mos kalojnë 70 përqind të të ardhurave përkatëse të klubit. Ky kufi synon të parandalojë situatat financiare ekstreme.
Ndryshe nga konfederata evropiane, DFL do të zbatojë një “sistem transparent dhe të qartë sanksionesh financiare dhe sportive”. Shkeljet mund të çojnë në sanksione me disa faza, duke filluar nga masa financiare dhe zbritje pikësh, deri te ndalime për të luajtur.