Kush do të jetë kreu i ri i SPAK? Të hënën mbledhja e parë e KLP-së
Këshilli i Lartë i Prokurorisë (KLP) thërret mbledhje për të shqyrtuar nëse katër kandidatët që kanë shfaqur interes për të drejtuar Prokurorinë e Posaçme kundër Korrupsionit dhe Krimit të Organizuar (SPAK) plotësojnë formalisht kushtet. Mbledhja do të mbahet këtë të hënë në orën dhjetë.
“Kjo mbledhje do të organizohet në sallën e mbledhjeve në prezencë të anëtarëve të Këshillit të Lartë të Prokurorisë, si dhe përfaqësuesve nga Prokurori i Përgjithshëm, Ministria e Drejtësisë, Projekti Eu4Justice dhe Programi OPDAT,” njofton zyrtarisht KLP.
Në rend dite do të jetë miratimi i projektvendimit “Për miratimin e listës së kandidatëve që plotësojnë kushtet ligjore të kandidimit për Drejtues në Prokurorinë e Posaçme kundër Korrupsionit dhe Krimit të Organizuar”.
Vetëm pasi të shqyrtohen të dhënat që plotësojnë katër kandidatët Adnan Xholi, Klodian Braho, Doloreza Musabelliu dhe Ervin Gokaj, të cilët garojnë për kryeprokuror të SPAK-ut, ata do të ftohen për t’u intervistuar nga Këshilli. Më pas do të caktohet një datë, në të cilën kandidatët do të prezantojnë platformën dhe vizionin e tyre.