Kostot e Prodhimit në Numra të Ulët, Pa Presion mbi Çmimet e Pakicës
Çmimet e prodhimit po shënojnë rritje me ritme shumë të ulëta, duke treguar një presion të kufizuar mbi çmimet e ardhshme të pakicës. Indeksi i Çmimeve të Prodhimit (IÇP) për tremujorin e katërt të vitit 2025 ka shënuar një rritje prej vetëm 0,2%. Ky tregues, i cili shihet si një barometër kyç për kostot me të cilat përballen bizneset para se produktet të arrijnë te konsumatori, ka arritur në vlerën 129,6, duke u bazuar në vitin 2021.
Megjithatë, disa sektorë ekonomikë janë përballur me një presion më të fortë rritës mbi kostot e tyre të prodhimit. Sektori kryesor që ka kontribuar në këtë tendencë është ai i “Industrisë përpunuese”, duke regjistruar një shtrenjtim vjetor prej 0,5%. Brenda kësaj kategorie, rritja më e ndjeshme e kostove është vënë re në prodhimin e mobiljeve, ku çmimet janë rritur me 1,5%, e ndjekur nga përpunimi i produkteve dhe preparateve farmaceutikë me një rritje prej 1,4%. Këta dy nën-sektorë kanë mbartur barrën kryesore të rritjes së kostove gjatë vitit të kaluar.
Një rritje tjetër është vënë re edhe në sektorin e furnizimit me ujë dhe menaxhimit të mbetjeve, me një rritje prej 0,2%. Nëse shqyrtojmë veçmas tregun vendas, prodhuesit që furnizojnë tregun e brendshëm janë përballur me një rritje vjetore prej 0,3%. Edhe këtu, industria përpunuese dominon, ku çmimet për konsumatorët vendas janë rritur me 0,8%.
Nga ana tjetër, tregu i eksportit ka treguar një zhvillim diametralisht të kundërt, duke regjistruar një ulje vjetore të çmimeve prej 0,4%. Kjo rënie në eksport është nxitur kryesisht nga sektori i energjisë elektrike, gazit dhe avullit, i cili është liruar me 1,8%, si dhe nga industria nxjerrëse dhe ajo përpunuese, të cilat kanë shënuar ulje të lehta.
Lidhur me ndryshimet afatshkurtra, krahasuar me tremujorin e tretë të vitit 2025, indeksi total ka shënuar një rritje pothuajse të papërfillshme prej 0,05%. Edhe në këtë periudhë tremujore, rritja më e madhe është vërejtur sërish në industrinë përpunuese me 0,2%. Ndërkohë, sektorë si ai i metalurgjisë dhe prodhimit të pajisjeve elektrike kanë shënuar ulje të çmimeve përkatësisht me 0,6% dhe 0,5%.