“`html
Kuvendi mbyll dëgjesat me kandidatët për Këshillin Mbikëqyrës të Bankës së Shqipërisë
Komisioni Kuvendor për Ekonominë, Punësimin dhe Financat zhvilloi sot seancën e dytë dëgjimore me kandidatët për anëtarë të Këshillit Mbikëqyrës të Bankës së Shqipërisë.
- Kandidati Elton Korbi theksoi nevojën për forcimin e qeverisjes së bankës qendrore, përmirësimin e mbikëqyrjes, rritjen e cilësisë së burimeve njerëzore dhe një vëmendje më të shtuar për mbrojtjen e konsumatorit. Ai nënvizoi se transformimi digjital dhe inteligjenca artificiale po ndryshojnë mënyrën e funksionimit të bankave qendrore. “Banka e Shqipërisë duhet të ndjekë në mënyrë aktive këto zhvillime, duke aplikuar teknologjitë e reja në analizën e të dhënave, mbikëqyrjen prudenciale, parashikimet makroekonomike dhe menaxhimin e riskut. Mbikëqyrja financiare duhet të shoqërohet edhe me një vëmendje të shtuar ndaj sigurisë kibernetike, duke kërkuar nga bankat dhe institucionet financiare standarde gjithnjë e më të larta në mbrojtjen e sistemeve, të të dhënave dhe të infrastrukturës kritike. Banka e Shqipërisë duhet të luajë një rol më aktiv në mbrojtjen e konsumatorit financiar, në mbikëqyrjen e institucioneve bankare dhe jobankare – veçanërisht mikrokredisë – dhe në forcimin e kërkesave për transparencë,” tha z. Korbi. Ai shtoi se çdo bankë qendrore moderne duhet të investojë vazhdimisht në kapitalin e saj njerëzor, duke theksuar nevojën për forcimin e politikave të rekrutimit konkurrues, zhvillimit profesional dhe motivimit afatgjatë të stafit, sipas modeleve të bankave qendrore europiane.
- Kandidati Selami Xhepa theksoi domosdoshmërinë e përshtatjes së rolit të Bankës Qendrore me zhvillimet e reja, sidomos me format e reja të parasë, të cilat shtrojnë sfida të reja për stabilitetin monetar dhe financiar. Ai theksoi nevojën për një kuadër rregullator më dinamik dhe një eksplorim më të thellë të misionit të mbrojtjes konsumatore, për të balancuar asimetrinë e fuqisë dhe informacionit mes qytetarëve dhe institucioneve financiare.
- Kandidatja Holta Zaçaj theksoi nevojën për të forcuar rolin e Këshillit Mbikëqyrës si garant i zbatimit të misionit ligjor të Bankës së Shqipërisë, duke balancuar pavarësinë e institucionit me një proces të besueshëm dhe transparent të llogaridhënies. Ajo nënvizoi forcimin e transparencës lidhur me produktet dhe shërbimet financiare si parakusht për rritjen e besimit të publikut dhe rolin e Bankës së Shqipërisë për të siguruar funksionimin e ndershëm në treg, nëpërmjet një qasjeje mbikëqyrëse të paanshme dhe proporcionale.
- Kandidati Pajtim Melani theksoi rolin e Komitetit të Auditit brenda Këshillit Mbikëqyrës si një organ që mund të kontribuojë në forcimin e transparencës, llogaridhënies dhe përgjegjshmërisë së institucionit.
- Kandidatja Luljeta Minxhozi theksoi nevojën për operacionalizimin e plotë të bazës së re ligjore dhe projekteve të reja lidhur me sistemet e pagesave. Ajo përmendi si sfidë tjetër për të ardhmen përmirësimin e hapjes dhe konkurrueshmërisë së sektorit bankar dhe financiar.
- Kandidatja Violeta Staka theksoi nevojën për forcimin e pavarësisë institucionale të Bankës së Shqipërisë dhe aftësinë e saj për t’u përshtatur me ndryshimet teknologjike.
- Kandidatja Merita Bejtja, duke u bazuar në eksperiencën e saj si inspektore e përgjithshme e Bankës së Shqipërisë, kërkoi besimin e deputetëve për t’u angazhuar në nivel politikëbërjeje si anëtare e Këshillit Mbikëqyrës.
- Kandidatja Liljana Mamadhaj theksoi nevojën për luftimin e flukseve të parave nga ekonomia informale që kanalizohen në ekonominë e ligjshme dhe për trajtimin e tyre si çështje prioritare për stabilitetin financiar. Ajo kërkoi luftimin më efikas të kanalizimit dhe pastrimit të këtyre flukseve në sektorin formal financiar.
- Kandidatja Ingrid Konomi theksoi nevojën për përmirësimin e procesit të llogaridhënies, transparencës dhe një pune më aktive për përmirësimin e edukimit financiar. Ajo gjithashtu shtroi domosdoshmërinë e një procesi rrënjësor të modernizimit teknologjik të Bankës Qendrore.
Në fund të vitit 2025, përfundoi mandati i gjashtë anëtarëve të Këshillit Mbikëqyrës të Bankës së Shqipërisë. Tre prej anëtarëve të rinj duhet të propozohen nga Kuvendi i Shqipërisë, ndërsa tre kandidatë të tjerë do të propozohen nga Këshilli i Ministrave. Në procedurën e hapur nga Kuvendi për tre kandidatët që duhet të propozohen nga ky institucion, aplikuan 20 kandidatë, nga të cilët 18 u paraqitën në seancën dëgjimore të zhvilluar nga Komisioni përgjegjës. Për t’iu propozuar zyrtarisht Kuvendit për votim, çdo kandidat duhet të mbledhë të paktën 28 vota të deputetëve. Ky proces pritet të mbyllet brenda 10 ditëve të ardhshme.
“`