Kodi Penal/ Gaz Bardhi: Të depenalizohen veprat e fyerjes dhe shpifjes
Kreu i grupit të Partisë Demokratike, Gazment Bardhi, ka reaguar lidhur me ndryshimet në Kodin Penal, të cilat janë diskutuar gjatë një seance maratonë në Parlament.
Sipas Bardhit, standardet evropiane për lirinë e shprehjes, si dhe raportet e OSBE-ODIHR, kërkojnë që Shqipëria të depenalizojë veprat penale të fyerjes dhe shpifjes, duke i konsideruar ato vetëm si shkelje civile.
Bardhi theksoi se ky hap është thelbësor për garantimin e lirisë së shprehjes, sidomos për median dhe aktivistët e shoqërisë civile.
Ai nënvizoi se opozita mbështet plotësisht depenalizimin e veprave penale për shpifje dhe fyerje, si dhe reformimin e rregullave civile për këto shkelje, në përputhje me standardet evropiane.
“Standardet evropiane për lirinë e shprehjes dhe raportet e OSBE-ODIHR kërkojnë që Shqipëria të depenalizojë veprat penale të fyerjes dhe shpifjes, duke i konsideruar vetëm shkelje civile. Kjo masë është e rëndësishme për garantimin e lirisë së shprehjes, veçanërisht për median dhe aktivistët e shoqërisë civile. Sot, plot 77 gazetarë në Shqipëri po përballen me akuza për shpifje nga politikanë apo ish-prokurorë/gjyqtarë të shkarkuar nga procesi i vetingut. Ky përbën një rrezik real për lirinë e shprehjes dhe sigurinë e gazetarëve. Për këtë arsye, opozita mbështet depenalizimin e plotë të veprave penale të shpifjeve/fyerjeve, si dhe mbështesim reformimin e rregullave civile për këtë shkelje sipas standardeve evropiane”, deklaroi Bardhi.