Deputetja britanike Sarah Pochin sugjeron bllokim vizash dhe ndihmash për Shqipërinë në rast refuzimi për të marrë të dënuarit.
Deputetja britanike e partisë Reform UK, Sarah Pochin, i ka bërë thirrje qeverisë së Mbretërisë së Bashkuar të vendosë një ultimatum ndaj Shqipërisë për pranimin e shtetasve shqiptarë të dënuar në Britani. Nëse Shqipëria refuzon, Pochin ka propozuar bllokimin e vizave britanike dhe ndërprerjen e ndihmës financiare.
Këto deklarata u bënë gjatë një interviste për Talk TV, ku deputetja komentoi propozimet e Nigel Farage për lirimin e të dënuarve të huaj nga burgjet britanike. Pochin u shpreh se lirimi i të dënuarve pasi kanë vuajtur vetëm një pjesë të dënimit është i papranueshëm dhe se një mënyrë e shpejtë për të liruar vend në burgje do të ishte kthimi i 10,700 shtetasve të huaj që aktualisht janë të burgosur.
“Zgjedhja e parë është, natyrisht, t’i dërgojmë në vendin e tyre të origjinës. Ne e dimë se shumica vijnë nga Shqipëria,” tha Pochin.
Ajo më tej propozoi që vendet që refuzojnë të pranojnë shtetasit e tyre të dënuar të përballen me masa ndëshkuese.
“Pse të mos i themi qeverisë shqiptare, ‘ju do t’i merrni mbrapsht. Nëse nuk e bëni, nuk do të merrni më asnjë vizë britanike. Nuk do të merrni më asnjë qindarkë ndihmë nga Britania. Merrini mbrapsht kriminelët tuaj. Pse duhet t’i financojmë ne këtu?’”, tha deputetja britanike.
Sipas saj, në rast se vendet e origjinës nuk pranojnë kthimin e të dënuarve, një alternativë do të ishte transferimi i tyre në një shtet të tretë. Gjatë diskutimit u përmendën El Salvadori dhe Kosova si destinacione të mundshme.
Sarah Pochin është deputete e Reform UK për zonën elektorale Runcorn and Helsby dhe gruaja e parë e zgjedhur në Parlamentin britanik nën këtë parti. Ajo fitoi zgjedhjet e pjesshme në maj 2025 me një diferencë të ngushtë prej vetëm gjashtë votash ndaj kandidates së Partisë Laburiste.
Deputetja ka qenë edhe më parë në qendër të polemikave për deklaratat e saj. Në tetor 2025, Pochin kërkoi falje pas një reagimi lidhur me reklamat në Britani, të cilat ajo i kishte përshkruar si të mbushura me persona me ngjyrë dhe aziatikë. Komentet u kritikuan ashpër në atë kohë. Kryeministri i atëhershëm britanik, Keir Starmer, i cilësoi ato si “racizëm tronditës”, ndërsa Nigel Farage pranoi se mënyra e formulimit ishte “e gabuar dhe e shëmtuar”, por argumentoi se qëllimi i deputetes nuk kishte qenë racist.