Titulli: A mund të jesh arrogant kur nuk luan Botëror që nga viti 2014? Dimarko sqaron festimin për kualifikimin e Bosnjës: Nuk ishte mungesë respekti.
Federiko Dimarko ishte një nga futbollistët e Italisë që u filmuan duke festuar pas ndeshjeve të së enjtes, në momentin kur Bosnjë-Hercegovina eliminoi Uellsin me penallti në fazën “play-off” të Botërorit. Pamjet u bënë virale në rrjetet sociale dhe shumëkush i cilësoi italianët si arrogantë për sjelljen e tyre, duke menduar se ata e kishin parë ndeshjen me Bosnjën si një sfidë më të lehtë.
Megjithatë, në konferencën për shtyp të sotme, Dimarko ka sqaruar se festa nuk kishte pasur aspak atë qëllim. Ai gjithashtu kritikoi televizionin që i kishte filmuar në atë moment, bashkë me shokët e tij, Vikario, Espozito dhe Meret.
“Respektoj çdo klub dhe çdo kombëtare. Ishte një reagim instinktiv. Thjesht po shihnim penalltitë me shokët. Në ekipin e Bosnjës është edhe Xheko, me të cilin kam luajtur dy vite dhe i kam shkruar. Jam i lumtur që do ta takoj në finale dhe ai më është përgjigjur. Nuk kam treguar mungesë respekti as ndaj Bosnjës, as ndaj boshnjakëve,” tha ai.
Dimarko shtoi: “Më kanë etiketuar si arrogant, por me çfarë të drejte, duke parë se mungojmë në Botëror që nga viti 2014? Si mund të jem arrogant? Përtej kësaj, them se ka qenë mungesë respekti filmimi në një ambient ku ishin të pranishëm edhe miq, familjarë dhe fëmijë.” Ai shprehu pakënaqësi edhe ndaj transmetuesit RAI, që kishte shfaqur pamjet.