Durrës: Ngjarje e rëndë, babai kërcënon vajzën dhe më pas tenton vetëvrasjen
Një ngjarje e rëndë është shënuar mbrëmjen e kësaj të premteje në Qerret të Durrësit, ku një baba, në gjendje të dehur, ka kërcënuar vajzën e tij me jetë dhe më pas ka tentuar të vetëvritet.
Sipas informacioneve të siguruara, Ardian Varrosi, pasi ka dhunuar më parë vajzën, e ka kërcënuar atë me thikë, duke i shprehur synimin për ta vrarë.
Vajza ka arritur të shpëtojë duke dalë nga banesa dhe duke kërkuar ndihmë nga fqinjët. Fqinjët, të njoftuar për situatën, janë drejtuar menjëherë drejt banesës së familjes Varrosi, ku kryefamiljari ka vijuar të tregojë sjellje kërcënuese edhe ndaj tyre.
Në vendin e ngjarjes kanë mbërritur dy patrulla policore, të cilat kanë ndërhyrë për të shmangur përshkallëzimin e mëtejshëm të situatës. Në momentin e mbërritjes së policisë, kryefamiljari është vetëqëlluar me thikë në zonën e qafës.
Ai është transportuar menjëherë në urgjencë dhe aktualisht po merr ndihmën mjekësore. Burime nga spitali i Durrësit bëjnë të ditur se gjendja e tij shëndetësore po monitorohet vazhdimisht nga stafi mjekësor.
Ndërkohë, policia ka nisur hetimet për zbardhjen e plotë të rrethanave të ngjarjes. Fillimisht janë marrë në pyetje anëtarët e familjes dhe pritet që, pasi të stabilizohet gjendja shëndetësore e kryefamiljarit, t’i merret edhe atij dëshmia.