Dy anëtarë të Gardës Kombëtare qëllohen me armë pranë Shtëpisë së Bardhë
Dy anëtarë të Gardës Kombëtare të SHBA-së u qëlluan me armë në Uashington, D.C., të mërkurën, sipas Sekretares së Sigurisë Kombëtare Kristi Noem. Të shtënat ndodhën në qendër të Uashingtonit.
Policia Metropolitane njoftoi në platformën X (ish-Twitter) se zona e ngjarjes është siguruar dhe një person i dyshuar është në paraburgim. Ata këshilluan publikun që t’i shmangej zonës.
Rrethanat e sakta të ngjarjes nuk janë bërë ende të qarta. Presidenti Donald Trump është informuar për ngjarjen, sipas një deklarate të sekretaries për shtyp, Karoline Leavitt. “Shtëpia e Bardhë është në dijeni dhe po e monitoron në mënyrë aktive këtë situatë tragjike,” tha Leavitt, duke shtuar: “Presidenti është informuar.”
Trupat e Gardës Kombëtare nga shtete të shumta kanë qenë të stacionuar në Uashington, D.C., për muaj të tërë si pjesë e përpjekjeve të Presidentit Donald Trump për goditjen e krimit në kryeqytetin e vendit.