Shqetësime për përshpejtimin e transmetimit të Ebolës në Kongo: 1,155 raste dhe 304 vdekje
Numri i rasteve të konfirmuara në laborator të epidemisë së virusit Ebola në Republikën Demokratike të Kongos ka arritur në 1,155, nga të cilat 304 kanë qenë fatale, njoftuan autoritetet shëndetësore të shtunën.
Sipas një buletini të fundit të autoriteteve shëndetësore, që nga e mërkura, u konfirmuan 37 raste të reja dhe 5 vdekje të reja brenda 24 orësh.
Zyrtarët e shëndetësisë deklarojnë se mbikëqyrja e përmirësuar epidemiologjike ka mundësuar zbulimin më të hershëm të rasteve dhe ka konfirmuar rritjen e vazhdueshme të transmetimit të virusit në baza javore.
Shpërthimi aktual, i shpallur më 15 maj, është shkaktuar nga lloji më i rrallë i virusit Budibugio, për të cilin nuk ekziston një trajtim apo vaksinë specifike. Shumica e shpërthimeve të mëparshme janë shkaktuar nga lloji i virusit Zaire, për të cilin ka një vaksinë të disponueshme.
Ky është shpërthimi i 17-të në vendin e gjerë të Afrikës Qendrore, me rreth 100 milionë banorë.
Autoritetet shëndetësore vlerësojnë se virusi kishte qarkulluar pa u zbuluar për një periudhë kohore para se të shpallej shpërthimi.
Ebola ka shkaktuar vdekjen e të paktën 15,000 njerëzve në Afrikë gjatë 50 viteve të fundit, me një shkallë vdekshmërie që varionte midis 25% dhe 90%, sipas Organizatës Botërore të Shëndetësisë (OBSH).
Në Republikën Demokratike të Kongos, shpërthimi më vdekjeprurës vrau gati 2,300 njerëz nga 3,500 raste të regjistruara midis viteve 2018 dhe 2020.