Shtëpia e Bardhë: Eric Wendt nominohet si ambasador i SHBA në Shqipëri, pritet miratimi nga Senati
Eric Wendt, nga Kalifornia, është nominuar nga Shtëpia e Bardhë si Ambasador i Jashtëzakonshëm dhe Fuqiplotë i Shteteve të Bashkuara të Amerikës në Republikën e Shqipërisë. Ky emërim pret miratimin e Senatit amerikan.
Nëse Senati miraton nominimin e tij, Eric Wendt do të marrë postin pas ambasadores Yuri Kim, e cila u largua nga Shqipëria në vitin 2023. Dy vite më parë, emërimi i diplomatit David J. Kostelancik për këtë pozicion dështoi, pasi nuk mori votat e nevojshme nga disa senatorë republikanë. Është theksuar se edhe një senator i vetëm ka mundësinë të bllokojë një emërim, ndërsa bllokimet e kandidaturave që kërkojnë konfirmim nga Senati janë një praktikë e zakonshme në debatin politik në Uashington.
Kush është Eric Wendt
Eric Wendt ka shërbyer si oficer aktiv në Ushtrinë Amerikane që nga viti 1986. Që nga viti 1991, ai është pjesë e forcave speciale si “Green Beret”, duke zhvilluar një profil të fortë si oficer i operacioneve speciale. Pas sulmeve të 11 shtatorit, ai ka marrë pjesë në disa misione të rëndësishme ndërkombëtare. Ai ka shërbyer në Indonezi si drejtues ekipi për Komandën e Paqësorit të SHBA-së, si dhe në disa operacione ushtarake, përfshirë operacionin “Liria e Qëndrueshme” në Filipine, operacionin “Liria e Irakut” në Irak dhe operacionin “Liria e Qëndrueshme” në Afganistan.
Përveç detyrave të shumta në struktura drejtuese, ai ka mbajtur edhe pozicione të rëndësishme, duke përfshirë rolin si ndihmës ushtarak kryesor i Sekretarit amerikan të Mbrojtjes. Wendt ka komanduar në të gjitha nivelet e forcave speciale, nga njësitë operative të vogla deri te komandat e mëdha rajonale të operacioneve speciale.
Ai flet gjuhën arabe dhe koreane. Wendt është vlerësuar me një sërë dekoratash ndërkombëtare dhe ushtarake, përfshirë:
- Kryqin e Artë të Nderit të Gjermanisë (për shërbimin në Afganistan)
- Vlerësim presidencial nga Filipinet
- Medalje nga Koreja e Jugut
- Disa insigna elitare si distinktivi i sulmeve ajrore, ai i parashutistit të avancuar, distinktivi “Ranger”, ai i forcave speciale dhe ai i këmbësorisë luftarake.
Në nëntor 2017, ai mori detyrën si Koordinator i Sigurisë i Shteteve të Bashkuara për Izraelin dhe Autoritetin Palestinez, duke luajtur një rol kyç në koordinimin e çështjeve të sigurisë në rajon.