Sondazh: Europianët shohin Donald Trump-in si armik përballë Shtëpisë së Bardhë
Pothuajse gjysma e europianëve e konsiderojnë Donald Trump-in si “armiqësor ndaj Europës”. Më tej, një pjesë e konsiderueshme vlerëson si të lartë rrezikun e një lufte me Rusinë, ndërsa mbi dy të tretat besojnë se vendet e tyre nuk do të ishin në gjendje të mbroheshin në rast të një konflikti të tillë, sipas një sondazhi të ri.
Anketa, e realizuar në nëntë vende europiane për platformën franceze të debatit “Le Grand Continent”, zbuloi gjithashtu se gati tre të katërtat e qytetarëve dëshirojnë që vendi i tyre të mbetet anëtar i Bashkimit Europian (BE). Gjithashtu, pothuajse po aq mendojnë se largimi i Britanisë së Madhe nga BE-ja i ka sjellë dëm asaj.
Jean-Yves Dormagen, profesor i shkencave politike dhe themelues i agjencisë së sondazheve Cluster17, vlerëson: “Europa jo vetëm po përballet me rreziqe në rritje, por po përjeton edhe një transformim të thellë historik, gjeopolitik dhe politik. Tabloja e përgjithshme tregon një Europë të shqetësuar, të vetëdijshme për cenueshmëritë e saj dhe që e ka të vështirë të projektojë veten në të ardhmen.”
Sipas sondazhit, mesatarisht 48% e europianëve e shohin Trump-in si armik. Ky numër arrin deri në 62% në Belgjikë dhe 57% në Francë, ndërsa nivel më të ulët ka në Kroaci (37%) dhe sidomos në Poloni (19%).
“Në mbarë kontinentin, trumpizmi shihet qartësisht si forcë armiqësore,” tha Dormagen, duke shtuar se ky perceptim po rritet, me më pak njerëz që e shohin Trump-in si neutral dhe më shumë që e konsiderojnë qartësisht si kërcënim.
Megjithatë, europianët vazhdojnë ta shohin marrëdhënien me SHBA-në si strategjikisht të rëndësishme: 48% mendojnë se BE-ja duhet të kërkojë kompromis me Uashingtonin, pavarësisht perceptimit negativ për Trump-in.
Sondazhi, i cili përfshiu Francën, Italinë, Spanjën, Gjermaninë, Poloninë, Portugalinë, Kroacinë, Belgjikën dhe Holandën, zbuloi se 51% e qytetarëve e shohin rrezikun e një lufte të hapur me Rusinë si të lartë, dhe 18% si shumë të lartë.
Dormagen thekson se një rezultat i tillë “do të ishte i paimagjinueshëm para disa vitesh dhe tregon se opinioni publik europian është zhvendosur drejt një epoke të re gjeopolitike, ku mundësia e një konflikti të drejtpërdrejtë në kontinent konsiderohet reale.”
Perceptimi i rrezikut ndryshon sipas afërsisë me Rusinë:
- 77% e polakëve e shohin rrezikun si të lartë
- 54% e francezëve
- 51% e gjermanëve
- 39% e portugezëve
- 34% e italianëve
Besimi në kapacitetet mbrojtëse kombëtare është i ulët në të gjitha vendet e anketuara: 69% e europianëve besojnë se vendi i tyre “nuk është realisht” ose “fare” në gjendje të mbrohet ndaj agresionit rus. Francezët janë më optimistët (44%), ndërsa edhe në Poloni, 58% mendojnë se vendi nuk do të ishte i mbrojtur.
“Po hyjmë në një epokë rreziku ndërsa ndihemi të dobët në nivel kombëtar,” tha Dormagen.
Vetëm 12% e europianëve thonë se nuk ndihen veçanërisht të kërcënuar.
Ndër kërcënimet më të përmendura nga europianët janë:
- Siguria teknologjike dhe dixhitale (28%)
- Siguria ushtarake (25%)
Ka kërkesë të fortë për mbrojtje të përbashkët europiane: 69% duan që BE-ja të luajë rol më mbrojtës.
Ndërkohë, shumica dërrmuese e qytetarëve të këtyre 9 vendeve mbështesin anëtarësimin në BE: 74% duan të qëndrojnë në union. Ky përqindje arrin 90% në Portugali, 89% në Spanjë, dhe bie në 68% në Poloni e 61% në Francë.
Pesë vjet pas Brexit, vendimi i Britanisë shihet si dështim: 63% mendojnë se ka pasur efekt negativ. Vetëm 19% e konsiderojnë pozitiv dhe vetëm 5% e shohin si “shumë pozitiv”.