FORMULA 1/ Çmenduri në Katar! Verstappen fiton garën pas gafës së skuadrës McLaren që i jep shpresa për titull rivalit
Max Verstappen ka shkëlqyer! Piloti i Red Bull fitoi Çmimin e Madh të Katarit dhe është kthyer fuqimisht në garën për titullin kampion, duke lënë pas vetëm edhe një garë, atë të Abu Dhabit.
Merita i takon një gare perfekte nga ana e tij, por edhe një gafe të jashtëzakonshme të skuadrës McLaren. Kjo e fundit dukej se kishte kontrollin e plotë të garës, me Piastrin dhe Norris në dy vendet e para dhe në komandë pas pak xhirosh.
Megjithatë, në xhiron e 8, kur u shfaq makina e sigurisë, të gjithë pilotët hynë në bokse, me përjashtim të dy makinave McLaren. Kjo i dha mundësinë Verstappen të kryente ndërrimin e gomave sipas dëshirës së tij dhe me një strategji tjetër.
Falë planifikimit të saktë edhe në ndalesën e dytë, ai mori kreun e garës, duke u shkëputur nga Piastri, i cili ndiqte në vendin e dytë, por edhe nga Norris, i cili rrëshqiti deri në vendin e pestë, edhe pse makinat McLaren ishin dukshëm më të shpejta se rivalët në këtë garë.
Norris arriti, në xhiron e fundit, të përfitonte nga një dalje e Antonellit para tij për të marrë të paktën vendin e katërt, por nuk arriti të kalonte Sainz, i cili u ngjit në shkallën e tretë të podiumit.
Kështu, me vetëm një garë të mbetur deri në fund të sezonit, Norris kryeson kampionatin me 408 pikë, i ndjekur nga Verstappen me 396 pikë dhe Piastri me 392 pikë. Gjithçka do të vendoset pas një jave në Abu Dhabi, me mundësi të ndryshme që mund të nxjerrin secilin prej këtyre pilotëve kampion bote.