Fermerët në Krujë shprehin shqetësim për rritjen e çmimit të naftës dhe inputeve bujqësore, duke theksuar se bujqësia po vuan.
Fermerët e rrethit të Krujës kanë shprehur shqetësimin e tyre lidhur me rritjen e çmimeve të karburantit, edhe para fillimit të konfliktit në Iran. Gjithashtu, edhe inputet bujqësore kanë pësuar rritje të ndjeshme, duke arritur në 30-40 për qind.
Kjo situatë ndikon drejtpërdrejt tek fermerët. Ata thonë se kostoja vetëm për plugimin e një hektari është rritur me 5000 lekë të reja. Edhe proceset e tjera kanë sjellë rritje të konsiderueshme të kostos, duke bërë që prodhimi të mos e justifikojë atë.
Njëri prej fermerëve u shpreh:
- “Sivjet jemi të detyruar të marrim para borxh te miqtë dhe të afërmit për të punuar tokat. Madje, disa prej nesh po shesin makineritë bujqësore sepse nuk kemi para për naftë.”
- “Skema e subvencioneve nuk është efikase, pasi sasia e naftës që na jep shteti nuk mjafton as për një proces pune, aq më pak për të përballuar të gjitha proceset.”
- “Kërkojmë nga shteti të ndërhyjë dhe të ndalojë abuzimin që po bëhet si me naftën ashtu edhe me inputet. Këto mallra nuk kanë ardhur rishtazi në Shqipëri, por janë magazinuar prej disa muajsh, prandaj nuk ka logjikë që çmimi të rritet në këtë mënyrë.”