Sébastian Lecornu është riemëruar në postin e Kryeministrit të Francës, duke marrë përsipër drejtimin e katërt qeveritar të këtij viti.
Pas dorëheqjes së javës së kaluar, Lecornu u rikthye në postin e Kryeministrit të premten. Të dielën, ai prezantoi një kabinet të ri qeveritar, përballë nevojës urgjente për të zgjidhur krizën politike dhe për të hartuar një plan buxhetor.
Kabineti i ri, i dyti drejtuar nga Kryeministri francez, përfshin 34 ministra. Ky grupim përbëhet nga anëtarë të mëparshëm të qeverive të kampit të Macron-it, konservatorë aleatë, si dhe individë nga jashtë sfere politike.
Në mesin e emërimeve të reja, ish-ministrja e Punës, Catherine Vautrin, merr postin e Ministres së Mbrojtjes. Ajo do të ketë përgjegjësi për mbikëqyrjen e mbështetjes ushtarake franceze për Ukrainën dhe për kërcënimet e sigurisë nga Rusia.
Laurent Nunez, shefi aktual i policisë së Parisit, do të drejtojë Ministrinë e Punëve të Brendshme. Roland Lescure do të jetë në krye të Ministrisë së Financave, duke u fokusuar në adresimin e borxhit në rritje dhe varfërisë.
Jean-Nowl Barrot është emëruar në Ministrinë e Punëve të Jashtme dhe pritet të shoqërojë Presidentin Macron në ceremoninë ndërkombëtare në Egjipt, që shënon armëpushimin në Gaza.
Qëndrueshmëria e këtij kabineti të ri mbetet e paqartë. Menjëherë pas publikimit të kabinetit të ri nga zyra presidenciale, partia konservatore republikane njoftoi përjashtimin e gjashtë anëtarëve që pranuan të bashkoheshin me qeverinë. Në një deklaratë në rrjetin social X, Marine Le Pen njoftoi synimin për të kërkuar një votë mosbesimi ndaj qeverisë të hënën.