Titulli: FSHF zbulon disa çështje të dyshimta gjatë monitorimit të Silvinjos në Europë; ai ndoqi një ndeshje ku një lojtar i Kombëtares nuk ishte as në stol
Federata Shqiptare e Futbollit (FSHF) ka njoftuar se trajneri i Kombëtares, Silvinjo, së bashku me stafin e tij, gjatë javëve të para të vitit, ka zhvilluar misione monitorimi të futbollistëve shqiptarë nëpër Europë. Ndërkohë që kjo veprimtari është pjesë e zakonshme e punës së një trajneri të ekipit kombëtar, ka pasur disa raste të pazakonta lidhur me lojtarët dhe ndeshjet që FSHF ka raportuar se janë ndjekur.
Fillimisht, janë ndjekur ndeshje të kampionatit shqiptar, me një fokus të dukshëm te Dinamo, pasi janë parë dy ndeshjet e saj kundër Vllaznisë dhe Egnatias. Më pas, në mënyrë të habitshme, është raportuar se Silvinjo dhe stafi i tij kanë ndjekur në Portugali sfidën e Ligës së Europës, Porto – Rangers, “për të vlerësuar nga afër paraqitjen e mesfushorit kuqezi Nedim Bajrami”. Problemi shtrohet pasi Nedim Bajrami nuk ishte në listën e skuadrës për ndeshjen kundër Rangers dhe as nuk kishte udhëtuar drejt Portugalisë për këtë sfidë.
Kjo ngre pyetjen se përse Silvinjo dhe stafi i tij kanë udhëtuar drejt Portugalisë, ndoshta për të vlerësuar lojtarë si Kvior dhe Bednarek të Polonisë që luajnë te Porto, por jo për të ndjekur Bajramin, siç ka raportuar FSHF. Një rast i tillë sugjeron se trajneri dhe stafi i tij mund të mos kenë qartësi mbi situatën e lojtarëve në klubet përkatëse.
Ndërkohë që ka shumë emra të rinj në Europë që po shkëlqejnë dhe meritojnë më shumë vëmendje, Silvinjo dhe stafi i tij kanë zgjedhur të shohin ndeshjen mes Lazios dhe Atalantës, ku luajnë dy lojtarë tashmë të njohur, Hysaj dhe Gjimshiti, me vetëm Gjimshitin që zbriti në fushën e lojës. Raportohet se ka pasur një takim me Gjimshitin atje, ndërsa me Hysajn u takuan në Tiranë.
NJOFTIMI I PLOTË I FSHF
Trajneri i Kombëtares shqiptare, Silvinjo, së bashku me stafin e tij teknik, kanë intensifikuar punën në kuadër të përgatitjeve për ndeshjen e fazës “play-off” të Botërorit 2026 ndaj Polonisë. Gjatë javëve të fundit, stafi teknik kuqezi ka ndjekur nga afër disa ndeshje të kampionatit “Abissnet Superiore”, për të vëzhguar lojtarët shqiptarë që aktivizohen në elitën e futbollit vendas. Mes takimeve të ndjekura kanë qenë Dinamo City – Vllaznia dhe Egnatia – Dinamo City.
Paralelisht me ndjekjen e kampionatit vendas, Silvinjo dhe stafi teknik kanë qenë të pranishëm edhe në disa takime në arenën europiane. Në Portugali, ata ndoqën sfidën e Europa League, Porto – Rangers, për të vlerësuar nga afër paraqitjen e mesfushorit kuqezi Nedim Bajrami. Ndërkohë, në Itali, stafi teknik ishte i pranishëm në ndeshjen Lazio – Atalanta, ku aktivizohen dy nga titullarët e Kombëtares, Berat Gjimshiti dhe Elseid Hysaj.
Gjatë qëndrimit në Itali, trajneri zhvilloi edhe një takim me kapitenin Berat Gjimshiti, ndërsa në ambientet e Federatës Shqiptare të Futbollit priti në një vizitë Elseid Hysaj, në kuadër të komunikimit me kapitenët e ekipit përpara ndeshjes së “Play-Off”-it.
Në javët në vijim, stafi teknik ka programuar të ndjekë nga afër edhe disa lojtarë të tjerë kuqezi në ndeshjet e tyre me klubet respektive, në mënyrë që të vlerësohet në detaje gjendja fizike dhe forma e secilit përpara sfidës së rëndësishme të “Play-Off”-it. Përgatitjet vijojnë me intensitet të lartë, ndërsa fokusi mbetet maksimal për arritjen e objektivit në përballjen ndaj Polonisë.