OBSH-ja: Shpërthimi i Ebolës në Kongo ka mbaruar
Një shpërthim i Ebolës në Republikën Demokratike të Kongos i ka ardhur fundi, njoftuan të hënën zyrtarët kongolezë të shëndetësisë dhe Organizata Botërore e Shëndetësisë (OBSH) e OKB-së. Kjo vjen pas një periudhe 42-ditore pa asnjë rast të ri të regjistruar.
Shpërthimi, i cili u shpall më 4 shtator pasi sëmundja u identifikua në zonën shëndetësore Bulape të provincës Kasai, ishte i pari në vend që nga viti 2022. Sipas Ministrisë së Shëndetësisë së Kongos, nga gjithsej 64 raste të konfirmuara, 45 persona humbën jetën dhe 19 u shëruan.
Që në fazat e para të shpërthimit, Kongo zbatoi një sistem kombëtar të ripërtërirë mbikëqyrjeje, i cili u mundësoi autoriteteve të hartëzonin me shpejtësi zonën e prekur dhe të kufizonin transmetimin e virusit.
“Kontrollimi dhe përfundimi i këtij shpërthimi të Ebolës brenda tre muajsh është një arritje e jashtëzakonshme,” theksoi drejtori rajonal i OBSH-së, Dr. Mohamed Janabi, në një deklaratë. Kongo do të hyjë tani në një periudhë 90-ditore të mbikëqyrjes së shtuar të sëmundjeve.
Ky ishte shpërthimi i 16-të i Ebolës në vendin e Afrikës Qendrore që nga identifikimi i parë i sëmundjes në vitin 1976, sipas OBSH-së. Nuk janë raportuar raste të reja që nga 25 shtatori, dhe pacienti i fundit i prekur nga Ebola u lirua nga spitali më 19 tetor.
Një shpërthim konsiderohet zyrtarisht i përfunduar vetëm pasi të kenë kaluar dy periudha maksimale inkubacioni prej 21 ditësh secila, pa u zbuluar raste të reja.
Virusi Ebola është një sëmundje e rrallë, por shpesh fatale, e cila është endemike në pyjet tropikale të Kongos. Ai transmetohet përmes kontaktit me gjakun dhe lëngjet e tjera trupore, duke shkaktuar simptoma si ethe, dhimbje trupi dhe diarre.