“`html
Ikona e futbollit polak shfaqet jooptimiste: “Tani kemi gjysmën e ekipit, Shqipëria ka cilësi pa yje”
Ndërsa tifozët polakë e përjetojnë me optimizëm pragndeshjen ndaj Shqipërisë, e vlefshme për fazën “play-off” të Botërorit 2026, disa figura të njohura të futbollit vendas paralajmërojnë për nevojën e kujdesit maksimal. Sipas tyre, ekziston mundësia e një surprize nga Kombëtarja shqiptare.
Ky mendim mbështetet edhe nga Marek Kozminski, një ish-futbollist polak me 45 paraqitje për ekipin kombëtar. Në një intervistë për “SportoweFakty”, ai theksoi se tifozët duhet të jenë realistë.
“Nuk jam aq optimist, edhe pse kam besim te ky ekip,” u shpreh Kozminski. “Megjithatë, duhet të ruajmë logjikën e shëndoshë. Kemi një ekip mjaft të pabarabartë. Pikat tona të forta janë Robert Lewandowski, Piotr Zieliński, Matty Cash, si dhe qendërmbrojtësit Jan Bednarek dhe Jakub Kiwior. Nuk e përfshij Nikola Zalewski aktualisht, pasi është i pezulluar për ndeshjen kundër Shqipërisë për shkak të kartonëve të verdhë. Kështu, sot, mund të mbledhim më pak se gjysmën e një ekipi me lojtarë të tillë të fortë dhe të besueshëm.”
Kozminski shtoi se Shqipëria, në krahasim, ka një ekip shumë të ekuilibruar. “Nuk kanë yje në nivelin tonë, por janë shumë cilësorë,” tha ai. “Kombëtarja polake varet shumë nga individualitetet, veçanërisht Zieliński dhe Lewandowski, për të luajtur mirë. Për më tepër, imagjinoni nëse një nga qendërmbrojtësit tanë të lartpërmendur mungon për shkak të dëmtimit apo pezullimit; ne menjëherë do të jemi në telashe serioze.”
“Prandaj, na nevojiten disa lojtarë të tjerë, përveç liderëve, të cilët të ngrihen në lartësinë e situatës dhe të performojnë në maksimumin e tyre. Atëherë do të jemi një kërcënim për cilindo nga tre kundërshtarët tanë. Unë besoj se ne si ekip kemi potencial më të madh futbollistik se Shqipëria, por edhe më të madh se Suedia apo Ukraina,” përfundoi Kozminski, i cili pjesën më të madhe të karrierës së tij e ka kaluar në futbollin italian, duke luajtur me Udinesen dhe Breshias.
“`