Studentë nga e gjithë bota drejt Evropës? Gara për talentet globale, destinacionet e reja
Prej vitesh, gjithnjë e më shumë studentë të huaj po ndjekin universitetet në Gjermani. Cilësia e lartë e arsimit dhe tarifat thuajse falas të shkollimit e bëjnë këtë destinacion tërheqës.
Karin Fischer nga Universiteti Berkeley i Kalifornisë thekson se arsimi i lartë në SHBA është një industri e madhe dhe shumë e shtrenjtë. “Diploma e një universiteti amerikan është një nga eksportet më të mëdha të Shteteve të Bashkuara, gjë që është interesante të mendosh në kontekstin e debateve për importet, eksportet dhe tarifat,” shprehet ajo.
Sipas Wido Geis-Thöne nga Instituti i Ekonomisë Gjermane në Këln, Gjermania mund të përfitojë nga emigracioni i studentëve. “Si rezultat, kemi një numër më të lartë studentësh që duan të studiojnë jashtë, janë në gjendje të studiojnë në universitetet amerikane, por po kërkojnë alternativa të tjera,” thotë ai.
Nevojat në tregun gjerman për specialistë
Më e rëndësishme se numri i studentëve është se sa prej tyre qëndrojnë në Gjermani dhe hyjnë në tregun gjerman të punës, i cili ka nevojë urgjente për punonjës të kualifikuar.
Andreas Schleicher nga OECD, drejtor për edukimin dhe kualifikimin, thekson: “Evropa është qartësisht më e fortë në zhvillimin e talenteve, por Shtetet e Bashkuara janë shumë më të afta në shfrytëzimin e mirë të talentit. Kjo është sfidë për Evropën. Tregu i punës është ende shumë i izoluar dhe i ngurtë në krahasim me SHBA-në. Atje, tregu i punës e ka më të lehtë të kuptojë ku është talenti dhe ta shfrytëzojë atë më mirë.”
Garë ndërkombëtare për talente dhe specialistë
Megjithatë, Evropa dhe Gjermania kanë bërë ndryshime reale në vitet e fundit. Shifrat e pasqyrojnë këtë.
Wido Geis-Thöne vë në dukje: “Rreth 45 për qind e atyre që vijnë në Gjermani si studentë ndërkombëtarë, janë ende këtu dhjetë vjet më vonë. Kjo është kuota më e lartë, pak përpara Kanadasë dhe shumë më e lartë se në shtetet e tjera anëtare të OECD-së.”
E ardhmja demografike e Gjermanisë varet nga këto talente. Deri në vitin 2030, vendit do t’i mungojnë dy milionë punonjës të kualifikuar. Universitetet janë porta drejt fuqisë punëtore.
Programi më prestigjioz i shkëmbimit në Amerikë, Programi Fulbright, i cili promovon paqen përmes shkëmbimit akademik, është vënë nën presion. Bordi i tij dha dorëheqjen në shenjë proteste, duke akuzuar qeverinë për ndërhyrje politike dhe bllokim të bursave.
Universitetet gjermane po e shfrytëzojnë këtë mundësi. Gara për talentet globale ka filluar. Nuk janë vetëm Evropa, Kanadaja apo SHBA; edhe Kina po konkurron me universitete dhe qendra kërkimore të reja për talentet më të shkëlqyera.