Gjenerali gjerman paralajmëron: Rusia mund të sulmojë NATO-n papritur, ka të gjitha kapacitetet
Një zyrtar i lartë ushtarak gjerman ka paralajmëruar se Rusia ka aftësinë për të kryer një sulm të kufizuar kundër territorit të NATO-s në çdo moment, ndërsa vendimi për të vepruar do të varet nga qëndrimi i aleatëve perëndimorë.
“Nëse vlerësojmë kapacitetet dhe fuqinë aktuale luftarake të Rusisë, ajo mund të nisë një sulm në shkallë të vogël kundër territorit të NATO-s që nesër,” tha gjenerallejtënant Alexander Sollfrank për Reuters në një intervistë. Ai sqaroi se bëhet fjalë për një sulm “i vogël, i shpejtë, i kufizuar rajonalisht, asgjë e madhe, pasi Rusia është shumë e angazhuar në Ukrainë për diçka të tillë.”
Sollfrank, i cili drejton komandën e operacioneve të përbashkëta të Gjermanisë dhe mbikëqyr planifikimin e mbrojtjes, përsëriti gjithashtu paralajmërimet e NATO-s se Rusia mund të nisë një sulm në shkallë të gjerë kundër aleancës me 32 anëtarë që në vitin 2029, nëse përpjekjet e saj për armatim vazhdojnë.
Presidenti Vladimir Putin mohon qëllime agresive, duke deklaruar se pushtimi në shkallë të plotë i Ukrainës në vitin 2022 ishte një masë mbrojtëse kundër ambicieve ekspansioniste të NATO-s ndaj Rusisë.
Duke folur nga selia e tij në veri të Berlinit, Sollfrank theksoi se, pavarësisht humbjeve në Ukrainë, forca ajrore ruse ruan ende një fuqi të konsiderueshme luftarake, ndërsa forcat bërthamore dhe raketore mbeten të paprekura. Ai shtoi se, ndërsa Flota e Detit të Zi ka pësuar humbje të mëdha, flotat e tjera ruse nuk janë zvogëluar.
“Forcat tokësore po pësojnë humbje, por Rusia thotë se synon të rrisë numrin total të trupave në 1.5 milionë ushtarë. Dhe Rusia ka tanke kryesore beteje të mjaftueshme për të bërë të imagjinueshëm një sulm të kufizuar që nesër,” shtoi Sollfrank, pa specifikuar nëse një sulm i tillë po planifikohet aktualisht.