“`html
Gjykata e Lartë vendos sot mbi kërkesën e Erion Veliajt për lirimin nga qelia
Gjykata e Lartë do të shqyrtojë sot rekursin e kryebashkiakut Erion Veliaj lidhur me masën e sigurisë. Rekursi i dorëzuar më 6 maj, dy ditë pas vendimit të Kolegjeve të Bashkuara të Gjykatës së Lartë për ndryshimin e praktikës lidhur me masën e arrestit.
Në kërkesën e Veliajt thuhet: “Kërkohet zëvendësimi i masës së sigurisë ‘Arrest në burg’, parashikuar nga neni 238 i Kodit të Procedurës Penale, me një masë më të butë si ‘Garanci pasurore’, parashikuar nga neni 236 i Kodit të Procedurës Penale, ose ‘Detyrim për t’u paraqitur në policinë gjyqësore’, parashikuar nga neni 234 i Kodit të Procedurës Penale”.
Dy ditë më parë, në Gjykatën e Posaçme kundër Korrupsionit dhe Krimit të Organizuar (GJKKO) u mbajt seanca për kryetarin e Bashkisë së Tiranës, Erion Veliaj. Seanca u shoqërua me mungesa të shumta të të pandehurve dhe përfaqësuesve të tyre ligjorë, si dhe debate procedurale mes palëve.
Në sallë munguan Meriman Palushi, ndërsa për shoqërinë “Palushi sh.p.k.” u paraqit vetëm avokati i saj. Gjithashtu, Sokol Kryeziu nuk ishte i pranishëm dhe fletëthirrja u kthye e panënshkruar, duke lënë mbrojtjen e tij të përfaqësuar vetëm nga avokatët. Mungesa u regjistruan edhe për disa subjekte të tjera.
Për “Gerard A sh.p.k.” u paraqitën përfaqësues ligjorë, ndërsa për “Fusha sh.p.k.” ishte i pranishëm avokati Uljan Bajrami. Meriton Lika nuk mori pjesë në seancë dhe munguan edhe avokatët e tij. Për “Lan sh.p.k.” u konstatuan mungesa të përfaqësuesve ligjorë, duke përfshirë edhe avokatët Maks Haxhia dhe Dritan Jahaj. Në sallë munguan përfaqësues për OJF “Qendra Harabel”, OJF “Byl-A” dhe OJF “Qendra Muza”, ku në disa raste ishin të pranishëm vetëm avokatët mbrojtës.
Valmir Xoxa mori pjesë në seancë, i përfaqësuar nga avokati i tij. U bë me dije se avokati Maks Haxhia ndodhej jashtë vendit për shkak të një takimi zyrtar. Gjithashtu mungonte avokati Dritan Jahaj, ndërsa për Xoxën u raportua revokimi i njërit prej avokatëve të saj dhe caktimi i një përfaqësuesi të ri.
Prokuroria e Posaçme (SPAK) kërkoi pezullimin e afateve të paraburgimit, duke argumentuar se mungesat e mbrojtjes ligjore po shkaktojnë shtyrje të procesit. Mbrojtja e Erion Veliaj e kundërshtoi këtë kërkesë, duke theksuar se i pandehuri nuk është shkak për vonesat dhe se nuk ka arsye për pezullimin e afateve.
Në përfundim, Gjykata e Posaçme vendosi ndërprerjen e seancës dhe caktimin e një date të re për vijimin e procesit.
Avokati i kryebashkiakut të Tiranës, Erion Veliaj, Plarent Ndreca, u shpreh për mediat se ka komunikim të vazhdueshëm me klientin e tij. Ai zgjodhi të mos komentojë vendimin e Gjykatës Kushtetuese, duke thënë se do të presë zbardhjen e plotë të vendimit. Ai shtoi gjithashtu se nuk kishte dijeni se në seancën e sotme do të ishte e pranishme edhe Erida Skendaj nga Komiteti Shqiptar i Helsinkit.
“`