Gjykata vendos vazhdimin e masave të sigurimit ndaj Belinda Ballukut dhe dy vartësve të saj.
Gjykata e Posaçme e Shkallës së Parë për Korrupsionin dhe Krimin e Organizuar ka vendosur të shtunën, më 22 nëntor, vazhdimin e masave të sigurimit personal ndaj zëvendëskryeministres Belinda Balluku. Masat përfshijnë pezullimin nga detyra dhe ndalimin e daljes jashtë shtetit, pasi ajo është marrë e pandehur nga SPAK për shkelje të barazisë në tenderin e Tunelit të Llogarasë dhe të lotit 4 të Unazës së Jashtme të Tiranës. Këto vepra penale dyshohet se janë kryer në bashkëpunim me vartësit e saj.
Gjithashtu, u vendos vijimi i masave të sigurimit personal “Arrest në shtëpi” për të pandehurin Erald Elezi, aktualisht administrator i Koorporatës Elektroenergjitike Shqiptare (KESH), dhe për drejtorin e Autoritetit Rrugor Shqiptar (ARRSH), Gentian Gjyli.
Gjykata ka urdhëruar SPAK-un dhe shërbimet e policisë gjyqësore për zbatimin e këtij vendimi.
Zëvendëskryeministrja, njëkohësisht ministre e Energjetikës dhe Infrastrukturës, Belinda Balluku, si dhe zoti Gjyli e zoti Elezi nuk iu përgjigjën pyetjeve të gazetarëve gjatë hyrjes dhe daljes nga ambientet e Gjykatës së Posaçme. Ata qëndruan për rreth pesë orë e gjysmë gjatë seancës, e cila kishte si objekt marrjen në pyetje dhe verifikimin e kushteve dhe kritereve për zbatimin e masave të sigurimit personal me karakter shtrëngues dhe ndalues, të caktuar më 19 nëntor.
Balluku, ish-drejtori i ARRSH-së, Evis Berberi, Gjyli, Elezi dhe vartës të tjerë të saj akuzohen se kanë manipuluar dy tenderat për Tunelin e Llogarasë dhe lotin 4 të Unazës së Jashtme të Tiranës, me vlerë totale 210 milionë euro, duke favorizuar kompanitë fituese.
Sipas vendimit të Gjykatës së Posaçme të Shkallës së Parë, masat e sigurimit ndaj Ballukut, si dhe ndaj vartësve të saj që drejtojnë KESH dhe ARRSH, janë të nevojshme pasi:
- Ekziston rreziku i dëmtimit të provave.
- Ekziston rreziku i ndikimit tek punonjësit e këtyre institucioneve që po merren në pyetje si dëshmitarë.
- Ata mund të vijojnë të abuzojnë me fondet publike.
- Ekziston rreziku i arratisjes.
Gjykata vlerëson se masat e sigurimit ndaj Ballukut nuk e pengojnë atë të ushtrojë funksionin si e zgjedhur në Kuvendin e Shqipërisë.
Kryeministri Edi Rama, një ditë më parë, ka sulmuar SPAK-un lidhur me masat e caktuara ndaj Ballukut dhe ka deklaruar se mazhoranca do ta ankimojë vendimin në Gjykatën Kushtetuese. Ndërkohë, qeveria do të operojë pa zëvendëskryeministër dhe pa ministër të Energjisë dhe Infrastrukturës.