Trump shkarkon 8 gjyqtarë të imigracionit në Nju Jork
Tetë gjyqtarë të imigracionit në Nju Jork u shkarkuan nga pozicionet e tyre të hënën nga Departamenti i Drejtësisë, sipas një sindikate që i përfaqëson ata. Ky veprim vijon në një periudhë tensionesh mes profesionistëve të këtij sistemi dhe administratës Trump.
Shoqata Kombëtare e Gjyqtarëve të Imigracionit (NAIJ), e cila konfirmoi lajmin për shtypin, deklaroi se të tetë gjyqtarët ishin të gjithë të stacionuar në ndërtesën e 26 Federal Plaza në Manhattan. Aty ndodhet një gjykatë që shqyrton rastet e emigrantëve që kërkojnë qëndrim të përhershëm.
Për muaj të tërë, oficerë të policisë federale me fytyra të mbuluara janë parë duke lëvizur nëpër korridoret e kësaj ndërtese, duke arrestuar emigrantë teksa largoheshin nga seancat dëgjimore, shpeshherë para syve të mediave, të cilat janë të pranishme pothuajse çdo ditë.
Këto pamje të tensioneve me policinë dhe ndarjes së familjeve janë transmetuar anembanë botës dhe e kanë kthyer këtë vend në një simbol të politikës së ashpër të administratës Trump kundër emigrantëve të paligjshëm në Shtetet e Bashkuara.
Ende nuk është e qartë arsyeja e shkarkimit të tetë gjyqtarëve. Megjithatë, ata i shtohen rreth 90 personave të tjerë, sipas vlerësimeve të New York Times, të cilët janë liruar nga detyrat e tyre që nga fillimi i vitit (nga një total prej rreth 600 gjyqtarësh).
Për grupet e të drejtave të emigrantëve, kjo tregon se administrata e miliarderit republikan dëshiron t’i zëvendësojë ata me gjyqtarë më të përafruar me politikat e saj.
Ky zhvillim vjen pas një mobilizimi të fundjavës, ku dhjetëra njerëz u mblodhën në Manhattan për të bllokuar një operacion të mundshëm të policisë së imigracionit (ICE) kundër emigrantëve. Departamenti i Policisë së Nju Jorkut njoftoi arrestime.
Në fund të tetorit, një operacion i ngjashëm nga policia federale në zonën turistike të Canal Street kishte shkaktuar gjithashtu protesta dhe tubime qytetarësh kundër tij.
Si një “qytet strehë” për emigrantët, Nju Jorku kufizon qëllimisht bashkëpunimin e autoriteteve lokale me agjencitë federale në operacionet kundër emigrantëve. Megjithatë, kjo nuk i ka penguar ato.