Grabitja Spektakolare e Muzeut të Luvrit: ADN-ja Çon në Zbulimin e Autorëve, Bizhuteritë me Vlerë 88 Milionë Euro Ende të Zhdukura
Zbulimi i një gjurme ADN-je ka shërbyer si kyç për arrestimin e dy autorëve të dyshuar të grabitjes së madhe në muzeun e Luvrit. Sipas informacioneve të BFMTV, të cilat citojnë një burim pranë ekipit hetimor, identiteti i njërit prej të dyshuarve u zbulua pikërisht falë një analize ADN të gjetur në vendin e ngjarjes.
Prokurorja e Parisit, Laure Beccuau, ka konfirmuar se gjatë hetimeve nga vendi i grabitjes u mblodhën mbi 150 mostra, duke përfshirë mostra ADN, gjurmë gishtash dhe prova të tjera. Autoritetet kanë analizuar të gjitha provat e lëna nga grabitësit në muzeun e Luvrit, siç ishin një helmetë, radio dore, jelek i verdhë dhe prerëse metalesh.
Dy personat e arrestuar janë rreth 30 vjeç dhe dyshohet se vijnë nga Aubervilliers. Roli i tyre specifik në këtë grabitje nuk është ende i qartë, por ata konsiderohen si “të dyshuarit kryesorë”. Njëri prej tyre, i cili sipas gazetës franceze “Le Monde” posedon shtetësi franceze dhe algjeriane, u arrestua në aeroportin Roissy-Charles de Gaulle teksa po përgatitej të udhëtonte drejt Algjerisë. Personi i dytë i arrestuar është shtetas francez.
Forcat e policisë kanë nisur ndjekjen e këtyre dy të rinjve për të mundur të gjurmojnë bizhuteritë e vjedhura dhe për të zbuluar eventualë bashkëpunëtorë.