Grabitje në Muzeun e Luvrit
Muzeu i Luvrit në Paris, destinacioni më i vizituar në botë, u mbyll papritur ditën e sotme pas raportimeve për një grabitje. Ministrja franceze e kulturës, Rachida Dati, bëri të ditur ngjarjen përmes rrjeteve sociale, duke përdorur fjalën franceze “braquage”, e cila mund të përkthehet si grabitje ose sulm me armë.
Ajo siguroi se nuk kishte të lënduar dhe se ajo ishte në vendngjarje së bashku me stafin e muzeut dhe policinë. Një anëtar i ekipit të ministres konfirmoi për agjencinë Agence France-Presse se të paktën një person kishte hyrë në muze, por nuk dha detaje të mëtejshme në lidhje me ndonjë vjedhje të mundshme.
Luvri njoftoi mbylljen për ditën “për arsye të jashtëzakonshme”, pa dhënë detaje specifike mbi atë që mund të ishte vjedhur.
Si një nga qendrat më të mëdha të artit në botë, Muzeu i Luvrit tërheq mbi tetë milionë vizitorë çdo vit. Koleksioni i tij përfshin vepra të shumta, duke filluar nga skulpturat antike deri te “Mona Lisa”, kryevepra e shekullit të XVI e Leonardo da Vinçit, portreti më i famshëm në botë.
Më herët këtë vit, presidenti francez Emmanuel Macron kishte njoftuar një program ambicioz rinovimi për muzeun. Ky vendim erdhi pasi drejtoresha e Luvrit, Laurence des Cars, paralajmëroi se vizita në godinën e tejmbushur ishte kthyer në një “sprovë fizike”. Në një shënim të publikuar në media në janar, des Cars theksoi se hapësira nën hyrjen me piramidë xhami nuk ofronte izolim adekuat nga moti, amplifikonte zhurmën dhe ishte e pakëndshme si për publikun ashtu edhe për stafin. Ajo ngriti gjithashtu shqetësime rreth rrjedhjeve të ujit, infrastrukturës së dëmtuar dhe luhatjeve të temperaturës, të cilat rrezikojnë ruajtjen e veprave të artit.