Naftëtarët e Marinzës, punonjës të kompanisë Bankers Petroleum, kanë hyrë në ditën e 10-të të grevës së urisë, duke kërkuar pagat e prapambetura dhe rritjen e tyre.
Të premten, ata protestuan para Ministrisë së Infrastrukturës dhe Energjisë, duke marrë mbështetjen e Sindikatës së Punonjësve të Hidrokarbureve dhe përfaqësuesve të shoqërisë civile.
Ilia Kondi, drejtues i Unionit të Sindikatave, deklaroi se “Gjendja shëndetësore e grevistëve po shkon nga ora në orë drejt përkeqësimit duke rrezikuar seriozisht jetën dhe shëndetin e tyre”. Ai shtoi se ata po luftojnë për paga dinjitoze dhe se është e papranueshme që qeveritarët të kenë paga 10 herë më të larta, ndërsa punëtorët diskutojnë për minimumin jetik.
Kompania Bankers Petroleum, e cila shfrytëzon fushën naftëmbajtëse të Patos Marinzës prej më shumë se 20 vitesh, aktualisht është nën hetim nga Prokuroria e Posaçme (SPAK) për një skemë mashtrimi. Prokuroria akuzon drejtuesit dhe ish-drejtuesit e kompanisë se i kanë shkaktuar miliona euro dëm buxhetit të shtetit.
Përmes grevës së urisë, naftëtarët kërkojnë paga dinjitoze, duke propozuar një rritje transparente të fondit të pagave nga kompania me 18% dhe shpërndarjen e tij tek pagat e ulëta.
Juristi Gentian Serjani u shpreh për BIRN se është e patolerueshme që institucionet shqiptare nuk po reagojnë për mbrojtjen e naftëtarëve dhe kundër një kompanie që abuzon me ta dhe pronën publike. “Kërkesa jonë ishte që Ministria përgjegjëse të mos heshtë, por të marrë rolin e ndërmjetësueses pa u përkeqësuar akoma më shumë shëndeti dhe jeta e naftëtarëve që janë në grevë urie,” tha Serjani.
Rigels Xhemollari nga “Qëndresa Qytetare” theksoi kushtet e vështira të punës së naftëtarëve në krahasim me pagën e tyre. Ai tha se “në një kohë kur Bankers ka zhdukur miliarda lekë nga pasuria e shqiptarëve, punëtorët e kësaj kompanie janë në grevë urie për pagat e prapambetura.” Xhemollari përfundoi duke thënë se punëtorët marrin një pagë aq sa duhet të merrnin dëmshpërblim për “helmin që kalon në gjakun e tyre për shkak të punës së vështirë.”