Macron: “Koalicioni i të Vullnetshmëve” do të krijojë një grup pune për garancitë e sigurisë për Ukrainën
Franca dhe Britania e Madhe do të krijojnë një grup pune brenda kuadrit të “koalicionit të të vullnetshmëve” me qëllim zhvillimin e garancive të sigurisë për Ukrainën. Në këtë proces pritet të marrin pjesë edhe Turqia dhe Shtetet e Bashkuara. Këto deklarata u bënë nga Presidenti francez Emmanuel Macron në përfundim të një takimi të koalicionit.
“Kemi vendosur që duke filluar nga dita e nesërme, të nisë një grup pune nën drejtimin e Francës dhe Britanisë së Madhe, me pjesëmarrjen e ngushtë të Turqisë, e cila luan një rol kyç në fushën detare, dhe për herë të parë, me pjesëmarrjen e Shteteve të Bashkuara”, theksoi udhëheqësi francez. Fjalimi i tij u transmetua në platformën sociale “X” të Pallatit Elysee.
Sipas zotit Macron, numri i trupave ukrainase të nevojshme për të zmbrapsur çdo agresion nuk duhet të jetë i kufizuar. “Përveç kësaj, duhet të ketë forca rezervë për të forcuar ushtrinë ukrainase në vijën e dytë”, shtoi ai.
Më parë, Ministri i Jashtëm rus, Sergei Lavrov, deklaroi se Moska nuk do të lejojë në asnjë rrethanë vendosjen e trupave të NATO-s në Ukrainë. Sipas tij, prania e trupave të aleancës në tokën ukrainase përbën një kërcënim për Rusinë.