Administrata Trump konfirmon se po heton vdekjet e mundshme për shkak të vaksinave kundër COVID-it.
Administrata Federale e Barnave (FDA) e Shteteve të Bashkuara po heton vdekjet e mundshme të lidhura me vaksinat kundër COVID-19, si tek fëmijët ashtu edhe tek të rriturit. Këtë e konfirmoi për AFP të martën një zëdhënës i sekretarit të shëndetësisë të Presidentit Donald Trump, Robert Kennedy Jr., i cili është i njohur për pikëpamjet skeptike ndaj vaksinave.
Ky hetim vjen në një kohë kur po rriten shqetësimet për politizimin në rritje të shërbimeve shëndetësore, që kur Robert Kennedy Jr. mori detyrën, duke ndryshuar në mënyrë thelbësore politikën e vaksinimit në SHBA.
“FDA po kryen një studim të thelluar mbi vdekjet e mundshme të lidhura me vaksinat kundër COVID në grupmosha të ndryshme”, tha për AFP-në Andrew Nixon, një zëdhënës i Departamentit të Shëndetësisë, duke konfirmuar raportimet e Bloomberg dhe Washington Post.
Ndërkohë, efektiviteti dhe siguria e vaksinave kundër sëmundjes së shkaktuar nga koronavirusi i ri janë konfirmuar nga studime të shumta. Edhe pse janë raportuar raste të rralla të efekteve anësore serioze, këto nuk kanë vënë në dyshim përfitimin e vaksinimit për shumicën e qytetarëve të të gjitha moshave, sipas autoriteteve shëndetësore në shumicën e vendeve të botës.
Zëdhënësi nuk sqaroi se kur do të bëheshin publike përfundimet e këtij studimi, metodologjia e të cilit aktualisht është e paqartë.
Hetimi, i cili fillimisht thuhej se do të përqendrohej në vdekjet e mundshme të fëmijëve, ka shkaktuar polemika të reja në javët e fundit, pas zbulimit të një memoje të brendshme në fund të nëntorit. Kjo memo, e cila i atribuohet një zyrtari të lartë të FDA-së, përmendte të paktën 10 vdekje fëmijësh të lidhura me vaksinat, pa paraqitur prova.
Rreth një duzinë ish-zyrtarësh të FDA-së kanë shprehur shqetësim të thellë që atëherë dhe kanë kërkuar kujdes, duke theksuar se “asnjë shpjegim për proceset dhe analizat që çuan në këtë vlerësim retrospektiv” nuk është bërë publik.
Sekretari i shëndetësisë i administratës Trump, Robert Kennedy Jr., është i njohur për përhapjen e informacioneve të rreme dhe teorive konspirative rreth vaksinave, veçanërisht atyre kundër COVID-19. Gjatë pandemisë, ai kishte pohuar se këto vaksina ishin “më vdekjeprurëset e prodhuara ndonjëherë” dhe kishte deklaruar, gjatë një eventi, se virusi (SARS-CoV-2) ishte “i synuar” etnikisht për të prekur grupe të caktuara të popullsisë.