“`html
Vrasje për qejf me snajper në Sarajevën e rrethuar nga serbët: Një italian në hetim
Një burrë i moshuar italian është vënë nën hetim si pjesë e një procesi nga prokurorët në Milano. Hetimi synon individë që dyshohet se kanë paguar anëtarë të ushtrisë serbe të Bosnjës për t’i shoqëruar në Sarajevë, me qëllim që të vrisnin civilë me snajper gjatë rrethimit 4-vjeçar të qytetit në vitet 1990.
80-vjeçari po hetohet me akuzën e vrasjes së rëndë, sipas një burimi pranë çështjes. I moshuari, një ish-shofer kamioni nga rajoni verior italian i Veneto, është personi i parë që vihet nën hetim që nga fillimi i procedurave në nëntor. Sipas raportimeve në shtypin italian, ai dyshohet të jetë mburrur për “kryerjen e një krimi”.
Më shumë se 10.000 njerëz humbën jetën në Sarajevë nga bombardimet dhe plumbat e snajperëve mes viteve 1992 dhe 1996, gjatë rrethimit më të gjatë në historinë moderne, pasi Bosnja dhe Hercegovina shpalli pavarësinë nga Jugosllavia. Snajperët përbënin ndoshta elementin më të frikshëm të jetës nën rrethim, pasi vrisnin njerëz të rastësishëm në rrugë, përfshirë edhe fëmijë.
Sarajeva ndodhet në një luginë të rrethuar nga male, gjë që e bënte sulmin ndaj saj veçanërisht të lehtë. Grupe italianësh dhe personash të kombësive të tjera, të quajtur “turistë snajperësh”, dyshohet se kanë marrë pjesë në krime pasi kanë paguar shuma të mëdha parash ushtarëve që i përkisnin ushtrisë së Radovan Karaxhiçit, ish-liderit serb të Bosnjës, i cili në vitin 2016 u shpall fajtor për gjenocid dhe krime të tjera kundër njerëzimit. Ata transportoheshin në kodrat përreth Sarajevës në mënyrë që të mund të qëllonin njerëz për kënaqësi.
Hetimi në Itali nisi pas një ankese ligjore të paraqitur nga Ezio Gavazzeni, një shkrimtar me bazë në Milano, i cili mblodhi prova mbi akuzat, si dhe një raport të dërguar prokurorëve nga ish-kryetarja e bashkisë së Sarajevës, Benjamina Kariç. Gavazzeni u shpreh se kishte lexuar për herë të parë raportet rreth “turistëve të snajperëve” në shtypin italian në vitet 1990, por kur pa dokumentarin “Sarajevo Safari” të vitit 2022, realizuar nga regjisori slloven Miran Zupanič, ai filloi të hetonte më tej. Në dokumentar, një ish-ushtar serb dhe një kontraktor thanë se grupe perëndimorësh qëllonin popullsinë civile nga kodrat përreth Sarajevës. Këto pretendime janë mohuar fuqishëm nga veteranët serbë të luftës.
Duke folur për “The Guardian” në nëntor, Gavazzeni tha se të dyshuarit italianë do të takoheshin në qytetin verior të Triestes dhe do të udhëtonin për në Beograd, nga ku ushtarët serbo-boshnjakë do t’i shoqëronin ata në kodrat e Sarajevës. “Kishte një trafik turistësh lufte që shkonin atje për të qëlluar njerëz,” tha ai. “Unë e quaj indiferencë ndaj së keqes.”
Ndoshta vrasjet më të njohura nga zjarri i snajperëve ishin ato të Boško Brkiç dhe Admira Ismiç, një çift i dokumentuar në filmin “Romeo dhe Zhuljeta e Sarajevës”, të cilët u vranë nga një snajper në vitin 1993 teksa përpiqeshin të kalonin një urë. Trupat e tyre mbetën në tokën e askujt midis pozicioneve boshnjake dhe serbe të Bosnjës për disa ditë. Fotografitë u botuan gjerësisht dhe u bënë simbol i rastësisë dhe çnjerëzimit të luftës.
“`