Homazhe për Ismet Bellovën, legjenda e mikrofonit sportiv përcillet për në banesën e fundit
Janë mbajtur sot në Tiranë homazhe në nderim të Ismet Bellovës, zërit legjendar të komentimit të ndeshjeve të futbollit, i cili u nda nga jeta një ditë më parë në moshën 91-vjeçare.
Pas homazheve, që u zhvilluan nga ora 10:00 në hollin e RTSH-së, ai u përcoll për në banesën e fundit.
Ndarja nga jeta e Ismet Bellovës është një humbje e madhe për sportin dhe median shqiptare. Kujtimi i tij do të mbetet i gjallë te brezat që edukoi, te dëgjuesit që e ndoqën dhe te historia e sportit shqiptar, ku emri i tij zë një vend nderi.
Kush ishte Ismet Bellova?
Bellova e nisi rrugëtimin e tij në sport herët, që në vitin 1948, kur u shpall kampion i vendit për të rinj në pingpong. Emri i tij u bë pjesë e historisë së transmetimeve sportive shqiptare më 29 nëntor 1950, me komentimin e ndeshjes Dinamo – Partizani 1–0, finalja e Kupës së Shqipërisë, duke shënuar fillimin e një karriere të gjatë në Radio Tirana.
Për kontributin e jashtëzakonshëm në sport, arsim dhe gazetari, ai u nderua me tituj e dekorata të shumta, ndër të cilat:
- “Mësues i Popullit”
- Urdhrin “Naim Frashëri” Klasi I dhe të Artë
- Urdhrin e Punës Klasi I
- “Nderi i Sportit Shqiptar”
- “Urdhri Olimpik”
- “Mirënjohja e Tiranës”
- “Nderi i Sportit Dibran”
- Titullin “Kalorësi i Urdhërit të Flamurit”
Në vitin 2004 u krijua Çmimi “Ismet Bellova” në gazetarinë sportive. Ai u vlerësua gjithashtu me Çmimin e Karrierës në TVSH, dy herë me Çmimin “Anton Mazreku”, si dhe me Mikrofonin e Artë në TVSH.