VIDEO/ Tentoi të ngrinte flamurin amerikan në qendër të kryeqytetit të Groenlandës, autori ndalohet nga policia
Banorët e Nuuk, kryeqytetit të Groenlandës, u përballën të mërkurën me një incident të pazakontë kur një burrë i panjohur tentoi të ngrinte flamurin amerikan në një shtizë jashtë Qendrës Kulturore Kutuaq, në qendër të qytetit.
Sipas policisë së Groenlandës, e cila konfirmoi ngjarjen për TV 2 të Danimarkës, incidenti u zhvillua në mënyrë paqësore, pasi të pranishmit arritën ta ndalonin autorin përpara se të kryente veprimin.
Policia mbërriti në vendngjarje pasi incidenti kishte përfunduar dhe aktualisht po heton rastin. Ngjarja ka rënë në një kohë kur Groenlanda, me rreth 56,000 banorë, ka qenë nën vëmendje të fortë ndërkombëtare.
Javët e fundit, administrata amerikane ka bërë deklarata të forta për përfshirjen e ishullit autonom në planet strategjike të SHBA-së, duke përfshirë sugjerime për përdorim të forcës dhe sanksione ekonomike ndaj vendeve evropiane.
Autoritetet lokale nuk kanë bërë ende komente për motivet e të dyshuarit, ndërsa hetimet për ngjarjen vazhdojnë.